DILI, 18 novembru 2019 (TATOLI) – Jornalista Rádiu Komunidade hosi munisípiu 12 inklui Rejiaun Administrativu Espesiál Oé-Cusse Ambeno (RAEOA) partisipa iha formasaun ne’ebé realiza hosi Instituto Camões iha loron 18 to’o 30 novembru.
Objetivu hosi formasaun ne’ebé realiza iha Pateo Colmera ne’e, hodi hasa’e koñesimentu jornalista sira di’ak liután iha área edisaun lian no drama.
Formasaun ne’e loke direitamente hosi Sekretáriu Estadu Komunikasaun Soasiál, Merício Juvinal dos Reis ‘Akara’, akompaña hosi Embaxadór Portugal iha Timor-Leste, José Pedro Machado Vieira.
“Reprezenta Governu, agradese tebes ba apoiu ne’ebé Uniaun Europeia fó liuhosi Instituto Camões, hodi oferese formasaun ba ita nia Rádiu Komunidade sira. Formasaun ne’e ko’alia kona-ba informasaun no mós oinsá jere ita nia osan. Tanba ne’e ha’u hanoin formasaun ne’e importante tebes”, tenik Akara ba Agência Tatoli, segunda ne’e.
Nune’e, nia husu ba jornalista hotu ne’ebé tuir formasaun atu bele aproveita ho di’ak oportunidade ne’ebé iha.
“Jornalista sira tenke aproveita ho di’ak oportunidade atu nune’e bele hasa’e di’ak liután koñesimentu. Formasaun ne’e ninia tema ko’alia kona-ba: Kuidadu Ita Nia Osan. Ida ne’e di’ak tebes tanba jornalista mós tenke aprende kona-ba Finansa Públika bainhira atu hala’o kobertura kona-ba finansa nian, bele iha ona koñesimentu ne’ebé di’ak atu nune’e fó sai informasaun ba komunidade sira ho loloos”, dehan Akara.
Iha fatin hanesan, Diretór Sentru Rádiu Komunidade, Abel da Conceição, hateten intensaun atu partisipa iha formasaun ne’e tanba fulan hirak ba kotuk, parte nasionál halo asesmentu ba Rádiu Komunidade hotu iha Timór laran no identifika hasoru difikuldade barak.
“Ida ne’e maka ita haree hosi rezultadu asesmentu, hatudu katak iha Rádiu Komunidade sira hasoru difikuldade barak. Entaun ita haree oinsá servisu ho Uniaun Europeia liuhosi Instituto Camões hodi realiza formasaun ba jornalista sira”, subliña diretor ne’e.
Jornalista: Hortençio Sanchez
Editór: Xisto Freitas
