Diretór Administrasaun Finansa no Lojístika, HNGV, Duarte Marçal Araújo. Imajen: Felicidade Ximenes

DILI, 18 novembru 2019 (TATOLI)-Ospitál Nasionál Guido Valadares (HNGV), iha tinan 2020 hakarak estabelese tan kuartu foun haat hanaran VVIP (Very Very Important Person) hodi halo atendimentu  no tratamentu ba pasiente sira, alende VIP (Very Important Person).

“Ami husu ba Governu orsamentu ne’ebé tau ona planu tinan-2020 tenki aprova no tuir ami-nia planu hakarak VIP ne’e atu loke tan ba kuartu foun haat hanaran VVIP ba ita-nia membru governu sira ne’ebé hetan moras,”hateten Diretór Administrasaun Finansa no Lojístika, HNGV, Duarte Marçal Araújo, ba media sira, iha HNGV, ohin.

Orsamentu ne’ebé HNGV tau ona ba planu ne’e, tuir nia, mak saláriu vensimentu, bens servisu ba kapitál dezenvolvimentu no mós kapitál menór ne’ebé momentu la aprova maibé tama ona hamutuk 12.1 millaun ne’e orsamentu ne’ebé boot iha HNGV ninian tanba ne’e tinan oin HNGV tama ona ba 17 anos eziste iha Timor-Leste: “Tanba ne´e mak tenke hadi’a ita-nia HNGV ida ne’e”.

Nia dehan, orsamentu ne’ebé boot sira mós aprezenta ona iha uma Fukun Parlametu Nasionál no fiar katak Komisaun F ne’ebé trata asuntu saúde bele aprova no mós Prezidente Repúblika bele promulga. “Se promulga ospitál ba oin tenke iha mudansa”.

“Sasán sira iha VIP laran ne’e sei troka hotu bainhira Prezidente Repúblika promulga osan tanba VIP ita garantia ema selu fatin ne’e regulár entaun ita tenke kria kondisaun ne’ebé di’ak,” reforsa Diretór Administrasaun Finansa no Lojístika, HNGV, Duarte Marçal Araújo.

Duarte haktuir, kondisaun ne’ebé ita hetan iha VIP hanesan infraestutura hotu la’o ho di’ak hanesan AC (ar condicionado) tenke di’ak, televizaun mós tenke di’ak no mós kona-ba doutór sira ne’ebé halo tratamentu ba ema tenke prontu no mós atetude ba ita-nia pesoál saúde tenke ho oin-midar hamnasa tanba HNGV sei orienta sira.

“Atu ko’alia kona-ba atitude sira ne’e la’ós ha’u nia área ne’e ba iha diretór klíniku no diretór enfermazen no parteira sira mak haree kona-ba ida ne’e maibé ami iha konsellu ami tenki fó no ami fahe esperiénsia ba malu katak servisu iha HNGV ne’e tenke iha domin katak ema ne’ebé mai ne’e hanesan ita-nia aan, kaer nafatin kultura ka sentimentu umanu ida ne’ebé hanesan kultura igreja nia katak hadomi hanesan ita-nia aan rasik ne’e mak ami tenki ko’alia ba malu,”.

Iha HNGV, atualmente tuir Diretór Duarte Marçal Araújo katak sala VIP la’o hela, kuartu balun mak AC la funsiona maibé sira sei bolu kompaña ida hodi hadi’a di’ak liután.

Jornalista :Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here