Joven hirak ne'e mak eleitu ba membru Parlamentu Foinsae periúdu 2019-2021. Imajen Tatoli/Hortençio Sanchez

Ba maluk joven sira ita idaidak moris mai ema hotu la hanesan, ema idaidak moris mai ho nia talentu ketak. Entaun, ita iha kór talentu ida ne’e tau hamutuk bele sai hanesan jardin di’ak ida ba ita-nia dezenvolvimentu

DILI, 14 novembru 2019 (TATOLI)-Prezidente Órgaun Reuniaun Jerál Alumni Parlamentu Foin Sa’e Timor-Leste (APFTL), Luzeiro Mateus Soares da Silva Dias hateten, kontribuisaun ba pás no dezenvolvimentu parte ida hosi tulun hadi’a nasaun ida-ne’e (Timor-Leste).

“Alumni Parlamentu Foin Sa’e sempre halo sensibilizasaun ba nia membru sira katak fatin ne’ebé membru alumni parlamenu foinsa´e iha, presiza sai nafatin ezemplu ba maluk seluk kona-ba kontribuisaun ba dezenvolvimentu p´s no estabilidade, sai autór ba prosesu nasaun sira ne’ebé konstruktivu. tulun hadi’a ita-nia nasaun ida ne’e,” dehan  Prezidente, Luzeiro Mateus Soares da Silva Dias, ba Ajénsia TATOLI iha Semináriu Nasionál Loron Mundiál ba Labarik, iha Salaun Luz Clarita, kinta (14/11).

Alumni Parlamentu Foin Sa’e iha kooperasaun ho instituisaun sira hanesan SEJD (Sekretáriu Estadu Juventude no Desportu), UNICEF (Organizasaun Nasaun Unida Fundu ba Labarik, sigla inglés), JIZ-Ajénsia internasionál Alemaña nian no organizasaun sira seluk tan atu kontribui hodi halo advokasia fó solusaun ba problema juventude nian.

“JIZ no Sekretáriu Estadu Juventude no Desportu halo programa edukasaun sívika, programa internet saudável, joven estudante sira presiza uza media sosiál ba parte ne’ebé pozitivu, labele asesu buat ne’ebé la di’ak”.

Prezidente Luzeiro Mateus Soares da Silva Dias, iha 2018 APFTL hetan konfiansa husi governu no tinan ne´e hamutuk ho komisaun juventude sira balun hodi organiza loron nasionál juventude, atu haree fila fali espiritu juventude sira-nia luta uluk presiza banati tuir. “Ohin loron kontestu dezenvolvimentu ita iha kolabora”.

Foin lala’is UNTL (Universidade Nacional Timor Lorosa´e) sai hanesan komisaun organizadora ba komemorasaun loron Masakre Santa Cruz, APFTL koopera ba iha loron nasionál.

“Juventude organiza, ita-boot sira haree iha talk show sira ne’ebé halo, semináriu nasionál, doasaun ran, limpeza, sira ne’e hotu atu dehan katak koopera para depois hatudu nafatin, fó nafatin motivasaun ba juventude katak juventude ohin loron iha kontestu dezenvolvimentu banati tuir espiritu juventude loriku Aswain, kontribui di’ak liután ba dezenvolvimentu para ita bele atinji, vizaun sira ne’ebé estabelese katak libertação da pátria, libertação do povo“.

Maske nune’e, la iha dezafiu boot liu hanesan organizasaun APFTL ne’ebé kompostu husi ema otas foin sa’e otas nurak, maioria estudante.

“Hatene ba eskola, ekonomia, tenke haree mós asuntu sira oinsá sustenta moris maibé hatudu fó kontribuisaun ba dezenvolvimentu juventudu liuhusi ativu iha organizasaun no mós asaun pozitivu seluk ne’ebé nia membru sira halo”

Dezafiu seluk, bainhira halo konvensaun advokasia la hetan solusaun ba juventude nia problema. “Dala ruma hasoru problema katak prosesu ne’e labele lao lala’is liu hanesan buat ne’ebé ita espera maibé ida ne’e alumni fuan boot, respeitu husu nafatin ba atividade relevante para serbisu hamutuk ho lalais ho efisiénsia, efetividade kontribui ba dezenvolvimentu juventude,” dehan prezidente órgaun reuniaun jerál APFTL.

Sai joven ne’ebé di’ak, nia esplika, tenke hanoin iha mundu katak ema barak hakarak moris iha lialoos no liberdade, justisa maibé iha ema  balun de’it hakarak halo sakrífisiu
hodi hetan lia loos, justisa, liberdade ne’ebé ema hotu goza.

“Entaun, ita juventude ohin loron hetan inspirasaun husi ita-nia eroi juventude Loriku Aswa´in, ne’ebé to’o ona ba hetan independénsia kontribui ba hamutuk ho eroi sira seluk luta na’in hetan independénsia iha situasaun difisil la halimar, susar ita atu imajina; uluk sira ba mate, ran fakar, simu kilat musan, hanesan ohin loron ita hamlaha ita ejize no loron manas ita ejize”.

“Ita iha liberdade iha fasilidade hotu, ita presiza kontribui ativamente iha dezenvolvimentu ho dignifika sira para hateten katak sira-nia mate sira-nia sakrifísiu folin boot, ohin loron povu goza, povu moris iha ekonomikamente di’ak saudável. Entaun, joven sira para konflitu”.

Tuir nia, joven sai autór ba pás no estabilidade, hanesan joven presiza uza liberdade, la’o halo belun ho ema hotu, esplora natureza nia furak la’ós para “kria moru” ba imi-nia aan maibé presiza halo ligasaun di’ak ba malu simu hanoin oioin ho kreatividade.

“Ba maluk joven sira ita idaidak moris mai ema hotu la hanesan, ema idaidak moris mai ho nia talentu ketak. Entaun, ita iha kór talentu ida ne’e tau hamutuk bele sai hanesan jardin di’ak ida ba ita-nia dezenvolvimentu.”

“Ita-nia tempu sei livre barak uza para kontribui ba dezenvolvimentu, para ona halo buat sira ne’ebé la di’ak, redús buat ne’ebé la di’ak; buat ne’ebé la di’ak ba saúde, la di’ak ba sosiedade, la di’ak ba ita-nia aan rasik,” nia konsidera.

APFTL ne’e forma husi eis-membru parlamentu foin sa’e sira ne’ebé termina mandatu iha Parlametu Foinsa’e, bainhira termina mandatu, eis-membru sira hanoin kedas atu aproveita esperiénsia ne’ebé iha ona Parlamentu Foinsa’e, amizade ne’ebé iha ona Parlamentu Foin sa’e.

“Formasaun ne’ebé iha ona Parlamentu Foinsa’e presiza halibur malu, estabelese organizasaun ne’e naran Alumni Parlametu Foinsa’e Timor-Leste atu bele kontribui ativu liután ba iha dezenvolvimentu nasionál ho pás no estabilidade, ne’e sinal di’ak ida katak eis-membru sira konsiente katak governu investe ona, agora tempu para sira mós halibur malu fó hanoin ba malu koopera ho governu para fó kontribuisaun di’ak liután ba dezenvolvimentu,” katak nia.

“Halo mós asaun sira ne’ebé di’ak ba dezenvolvimentu no kolabora ho programa governu ni’an ba estadu tomak instituisaun órgaun sira ne’ebé presiza no nesesáriu para halo kooperasaun kontribuisaun ba dezenvolvimentu”.

Nune’e, alumni parlamentu foin sa’e sempre agora daudaun iha nia programa ida ne’ebé sempre halo ba eskola sira, foin dada’uk halo ba iha suku Comoro, Kampung Alor no ba munisipiu sira kona-ba joven sivi sai sidadun ne’ebé síviku.

“Fó formasaun ba joven sira para joven sira bele koñese nia abilidade moris, joven bele hatene maneira ne’ebé di’ak oinsá halo publikasun, kria relasaun di’ak ho maluk seluk, dezenvolve nia abilidade no talentu para kontribui ba dezenvolvimentu kontribui ba páz no estabilidade,” nia haktuir.

Atu konklui, Prezidente Órgaun Reuniaun Jerál APFTL, Luzeiro Mateus Soares da Silva Dias friza,   juventude sira, ita-nia nasaun foun, ita-nia inan aman sira ita-nia eroi barak iha esperansa katak ita maka sei transforma nasaun ne’e sai di’ak liu, ita sei fó klosok ba sira. Entaun, uza didi’ak ita-nia tempu ho ita-nia enerjia, ita mak idade ne’ebé enerjétiku. Katak, ita bele halo serbisu ho lalais liu, forsa liu inan-aman sira, tanba sira-nia idade avansa..

Jornalista : Nelia Fernandes
Editór         : Rafy Belo

1 KOMENTÁRIU

  1. Foin lalais laos UNTL maka organiza Komemorasaun Loron Masakre Santa Cruz. Mak organiza ne UNE-TL (Uniao Nacional dos Escuteiros Timor-Leste)

HAKEREK NO HATÁN

Please enter your comment!
Please enter your name here