Prezidente Konsellu Administrasaun ANATL, E.P, Romualdo da Silva. Foto/Natalino Costa.

DILI, 18 novembru 2019 (TATOLI) – Prezidente Konsellu Administrasaun Ajénsia Nasionál Aviasaun Timor-Leste, Empreza Públika (ANATL, EP), Romualdo da Silva, hateten ANATL aproxima ona hodi empresta komponente jeradór nian hosi Devita Group ba funsionamentu normál jeradór hosi Aeroportu Internasionál Nicolau Lobato.

“La’ós jeradór aat maka ami la hadi’a, maibé ekipamentu maka sei order liuhosi Empreza Tratorindo, nune’e maka ami aproxima Empreza Devita Group hodi empresta ninian hodi halo funsionamentu ba jeradór, se iha stock, ami foti hafoin ami rezolve”, Romualdo da Silva ba Ajénsia Tatoli iha ámbitu vizita Ministru Transporte no Komunikasaun (MTK), José Agostinho da Silva, iha Aeroportu Dili, ohin.

Jeradór ne’e falla iha sábadu (16/11) tanba konsidera komponente hosi jeradór nian ida maka aat, nune’e ANATL esforsu iha semana ne’e nia laran, atu jeradór tenke normál filafali.

Tuir Romualdo katak mákina jeradór ne’e ida de’it no uza ba tinan 10 ona, nune’e nia husu ba MTK atubele hola tan ida hodi back up banhira ida aat, ida bele responde situasaun imediata.

Entretantu, Ministru José Agostinho fó hanoin katak tenke asegura nafatin aeroportu, atu funsionamentu la’o di’ak, se la’e falla iha materiál raiu-xís, entaun ema tama-sai sei labele deteta bainhira lori buat ruma tama.

“Ita-nia seguransa ameasadu tebes tanba funsionamentu eletrisidade, tanba ne’e importante tenke rezolve lalais”, ministru hato’o ba ANATL iha aeroportu Dili, bainhira halo observasaun direta ba jeradór ne’ebé konsidera avaria.

Notísia relevante : Konsege Normaliza Ahi, La Implika Aviaun “Landing no Take Off”

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here