Komandante Operasionál PNTL Munisípiu Ainaro, Inspetór Xefe, Martinho Borges. Imajen/Egas Cristovão

AINARO, 18 novembru 2019 (TATOLI)—Komandu Polisia Munisípiu Ainaro ‘orgullu’ ho kolaborasaun di’ak hosi entidade hotu-hotu, hahú hosi povu, juventude, veteranu no entidade relijiozu sira, ne’ebé kolabora di’ak tebes hodi asegura Ainaro livre hosi konflitu hotu, inklui livre hosi konflitu grupu juventude.

Komandante Operasionál Polísia Nasionál Timor-Leste (PNTL) Munisípiu Ainaro, Inspetór Xefe, Martinho Borges, hateten, situasaun jerál dezde inísiu tinan 2019 to’o agora normál no laiha ona konflitu entre grupu juventude.

Komandante Operasionál ne’e dehan, alein de kolaborasaun di’ak  hosi povu, autoridade sira polisia nian kontinua hala’o sensibilizasaun lei sira ba komunidade no estudante sira, hanesan lei arma branka 15/2017 la’o ho di’ak, ne’ebé hetan partisipasaun másimu hosi komunidade.

Tuir nia, durante ne’e problema barak liu dalaruma mosu hosi estudante sira, entaun polísia sensibiliza sira oinsá koñese didi’ak lei arma branka no lei sira seluk.

“Ainaro, to’o agora ita seidauk identifika konflitu entre grupu juventude sira. Ha’u kaer operasaun dezde 2013 problema entre grupu organizasaun juventude sira laiha,” hateten Inspetór Xefe Martinho Borges, ohin, hodi responde TATOLI iha nia servisu fatin Komandu PNTL Munisípiu Ainaro.

Nia hatutan, komunidade hotu iha Ainaro, liuliu juventude no estudante sira kontribui maka’as ba pás no estabilidade  no nia espera a situasaun ne’e kontinua mantein ba oin, nune’e ema hotu moris ho hakmatek.

Rejista Kazu 71

Biban ne’e, Servisu Investigasaun Kriminál (SIC-sigla portugés) relata katak, durante janeiru to’o fulan ikus outubru nian,  SIC rejistu kazu hamutuk 71.

Tipu kazu sira ne’e kompostu hosi, kazu Ofensa ba Integridade Fízika Simples (OIFS) hamutuk 25, violénsia doméstika (13), maustratus no konjuje (2), koasaun seksuál (1), abuzu seksuál ba menór (5), violasaun seksuál (3), distrubánsia jerál (1), inséndiu (1) no  kazu ameasa (3). Nune’e mós kazu danu simples (4), la halo tuir obrigasaun alimentár (3), abuzu sinál uniforma públiku (2), falsifika dokumentu (1), infantisídiu (oho-oan) (1), estraga ai-horis (1).

Portantu iha inísiu novembru, PNTL Munisípiu Ainaro foin rejista kazu 3, asaltu (2) no danu simples (1).

Munisípiu Ainaro iha Postu Administrativu haat (4), mak hanesan Ainaro Vila, Hatubuiliko, Hatu-Udo no Maubisse ho iha suku 21 no ho aldeia 131.

Iha suku 21 ne’e Komandu PNTL Ainaro koloka hotu ona membru Ofisial Polisia Suku (OPS) ba kada suku hirak hodi tau matan no kolabora ho autoridade suku no komunidade, inklui juventude sira hodi asegura situasaun pás no armonia iha suku laran.

Postu Administrativu Ainaro Vila rasik iha suku hitu (7), hanesan Ainaro, Manutasi, Soro, Suro Kraik, Cassa, Mau-Nuno no Mau-Ulo.

Postu Administrativu Hato-Builiko iha suku tolu (3), Mauchiga, Mulo no Nuno-Mogue. Postu Administrativu Hatu-Udo iha suku rua (2), Foho Ai-Lico no Leolima.

Postu Administrativu Maubisse iha suku sia (9); Aituto, Edi, Fatubessi, Horai-Quic, Liurai, Manelobas, Manetu, Maubisse no Maulau.

Jeografikamente Munisípiu Ainaro lokalizadu iha area sudoeste Timor-Leste ho nia luan 797 km2 no totál populasaun na’in 59,175 bazeia ba sensu 2010.

Jornalista : Evaristo Soares Martins

Editór       : Francisco Simões

HAKEREK NO HATÁN

Please enter your comment!
Please enter your name here