Prezidente Komisaun Organizadora Tinan 20 Konsulta Populár, Kay Rala Xanana Gusmão. Foto TATOLI: António Gonçalves

DILI, 16 novembru 2019 (TATOLI) – Lidér másimu Aliansa Mudansa ba Progresu (AMP), Kay Rala Xanana Gusmão, la marka prezensa (auzente) iha atividade konferénsia ba daruak nian ne’ebé realiza iha Sentru Formasaun Tibar, ohin.

Koordenadór Jerál Konferénsia, Francisco Kalbuadi Lay, haktuir Xanana Gusmão la hola prezensa iha konferénsia ne’e tanba nia, aban (17/11), sei tuir konferénsia ASEAN no Pasífiku kona-ba pás no establidade iha Kambodia, maibé líder PLP no atuál Primeiru-Ministru, Taur Matan Ruak, no líder partidu Khunto, Naimori Bucar, hola prezensa iha konferénsia ne’e.

“Prezidente Partidu CNRT hato’o komprimentu ba konferensista sira AMP nian tanba nia (Xanana) sei hala’o serbisu iha rai-li’ur no aban sei tuir konferénsia iha ASEAN no Pasífiku kona-ba pás no  estabilidade nian iha Kambodia”, haktuir mensajen.

Maski nune’e, Kalbuadi salienta katak konferénsia ne’e ho objetivu klaru katak atu konsolida no fortifika koaligasaun partidária hanesan Kongresu Nasionál Rekonstrusaun Timorense (CNRT, sigla portugés), Partidu Libertasaun Popular (PLP) no Kmanek Haburas Unidade Nasionál Timor Oan (KHUNTO).

“Atividade konferénsia ne’e maka atu konsolida no fortifika atu AMP sai unidu nafatin hodi tau interese Estadu no povu nian”, katak.

Entretantu, iha konferénsia ne’e, Kalbuadi husu ba konfrensita hotu atu ho konxiénsia no ho responsabilidade hodi sukat ko’alia, atu atividade bele kria amizade ne’ebé di’ak liután no hametin konfiansa entre AMP.

Jornalista : Zezito Silva
Editora : Maria Auxiliadora

HAKEREK NO HATÁN

Please enter your comment!
Please enter your name here