Mapa eskola iha RAEOA. Imajen hosi portál zeesm.tl.

OE-CUSSE, 16 novembru 2019 (TATOLI)—Autoridade Rejiaun Administrativu Espesiál Oe-Cusse Ambeno (RAEOA), Antonio Bouque Fae, hateten planu rekrutamentu ba profesór na’in 125 iha RAEOA foin mak atinji bazeia ba Orsamentu Jeraál Estadu 2019 nian ne’ebé  aloka ba rejiaun refere.

Nia hatutan, prosesu rekrutamentu ba profesór 125 pesoas ne’e atu substitui fali profesór sira seluk ne’ebé mate no reformadu ona. Tan ne’e, liu husi OJE 2019 nian foin mak realiza prosesu rekrutamentu refere ministériu edukasaun loke ba públiku.

“Ita iha purvolta profesór 40 mak mate no 70 mak reforma ona ne’eduni 2017 profesor 70 ne’e reforma hotu. Agora foin mak ita loke prosesu rekrutamentu dezde 2010 to’o agora,” dehan Antonio Bouque Fae ba jornalista sira iha Salaun Ministériu Edukasaun Rejiaun Oe-Cusse, Santa Rosa, sábadu (16/11/2019)

Prosesu rekrutamentu ne’e, nia esplika, hahú halo iha jullu tinan ida ne’e bazeia ba OJE ne’ebé Governu sentrál transfere iha juñu. Agora prosesu ne’e RAEOA hala’o bazeia ba verifikasaun ba eskola 90 resin inklui eskola privadu hotu ninia nesesidade. Portantu prosesu rekrutamentu ne’e tama ona iha faze avaliasaun eskrita ne’ebé hahú ona iha 14 novembru 2019.

Maibé, nia informa, parte balun la satisfas ho prosesu rekrutamentu ne’e tanba razaun katak iha indikasaun nepotizmu. Tanba kandidatu balun la pasa iha faze selesaun dokumentu depois bolu hodi mai tuir avaliasaun eskrita ne’e konsidera informasaun ne’e la loos tanba sira hirak ne’e la hatene ninia prosesu.

“Molok atu halo prosesu rekrutamentu ne’e ami hein karik ema ruma hakarak halo konfirmasaun, ami prontu halo esplikasaun maibé laiha entaun ami hanoin ema komprende ona ninia prosesu ne’e,” nia dehan.

Husi reklamassun sira ne’ebe mosu, nia dehan, buat hotu liu tiha ona tanba parte edukasaun simu problema husi kada eskola sira ninian liuliu difikuldade kona-ba profesór sira. Tanba ne’e, nia infroma, ministériu rejista kuaze eskola 90 resin presiza tan profesór 170 resin hodi apoiu prosesu ensinu aprendizazen.

Prosesu rekrutamentu ne’e,  RAEOA loke ba públiku bazeia ba nesesidade eskola sira nian hanesan iha Palaban, Nitibe, Oesilo, menus liu profesór hahú kedas 2015 to’o agora maibé iha Pante Makasar profesór barak tebes. Tanba ne’e, nia dehan,  mak maluk balun la satisfás maibé nu’udar autoridade espera katak buát hotu bele la’o nafatin hodi hetan rezultadu ne’ebé di’ak.

Notísia relecante:Dezenvolvimentu Oe-Cusse Konsidera Moderna

Jornalista: Tomé Amado

Editór     : Rafy Belo

HAKEREK NO HATÁN

Please enter your comment!
Please enter your name here