Fakuldade Siénsia Sosiál, UNTL. Imajen/Espesiál
Edifísiu Fakuldade Siénsia Sosiál, UNTL. Imajen/Espesiál

DILI, 16 novembru 2019 (TATOLI), Dekanu Fakuldade Siénsia Sosiál (FCS, sigla portugés), Camilo Ximenes Almeida hateten, karik iha posibilidade iha 2020 kuandu universidade aselera, bele implementa post-graduasaun tanba prosesu hotu fakuldade aprezenta ona ba iha universidade.

Profesór Camilo Ximenes

Iha universidade (UNTL) iha fakuldade sira seluk hanesan Fakuldade Edukasaun parese iha ona post-graduasaun ba mestradu ba matemátika no mós língua, iha Fakuldade Ekonomia, Agrikultura no iha Direitu.

“Ita iha FSS, ita hato’o ona ita-nia proposta iha 2020 ita halo prepara, 2021 ita bele iha ona post-graduasaun, liuliu ba Dezenvolvimentu Komunitáriu no mós post-graduasaun ba iha Estudo da Paz ne’ebé agora dadaun la’o hela,” hateten Dekanu Fakuldade Siénsia Sosiál (FSS), Camilo Ximenes Almeida ba jornalista sira iha serimónia judísiu iha kampus FSS, Caicoli, Dili, ohin.

Tuir nia hanoin katak, área sira ne’ebé iha, hanoin governu la presiza haruka ema ba tuir iha rai liur tanbá  iha balun ne’ebé presiza ona dezenvolve liu iha universidade iha FSS, nune’e bele halo investimentu iha rai laran. “Governu bele fó bolsa estudu ruma ba estudante sira ou ba funsionáriu sira ne’ebé hakarak mai estuda iha fakuldade ida ne’e”.

Dekanu FSS ne’e informa, fó limitasaun katak kursus ida ba post-graduasaun bele iha ema na’in 15, kuandu ema na’in 15 ne’e to’o ona, quer dizer prienxe ona rekezitu mínimu. “Se liu ba to’o ema na’in 25 ne’e di’ak liu”.

Iha parte seluk, manorin na’in ne’e informa, ba área post-graduasaun ne’ebé atu implementa uluk mak Dezenvolvimentu Komunitáriu no Post-Konflitu, segundu posibilidade atu loke Post-graduasaun ba iha Polítika Públika. “Tanba ita hatene katak iha Timor Lorosa’e, ita-nia funsionáriu sira ne’ebé barak liu hakarak kontinua sira-nia estudu, kapasita sira-nia aan entaun, hanoin Polítika Públika ne’e importante ba sira”.

Kona-ba dosente sira ne’ebé atu hanorin, Dekanu FSS, Camilo Ximenes Almeida hateten, dosente iha FSS profesór permanente ne’ebé doutoradu kuaze ema na´in 20 resin no iha profesór konvidadu ne’ebé sei mai na’in lima, ne’e sufisiente ona.

“Ida ne’e em termos de rekursu umanu ita sufisiente ona, iha matéria balun ne’ebé karik ita la iha, ita bele konvida profesór sira ne’ebé iha universidade seluk atu bele hanorin,” katak nia.

Dekanu FSS, Camilo Ximenes Almeida akresenta, tau post-graduasaun ne’e tanba agora daudaun iha profesór 20 resin no espera profesór konvidadu na’in lima ne’ebé mai husi estranjeiru no mós iha rai laran ne’ebé karik fakuldade ne’e la iha.

“Dosentes na’in lima husi estranjeiru labele temi, ita mós bele tau oportunidade ba nasaun sira ne’ebé ko’alia língua portugés no nasaun ne’ebé besik ita, no mós ba nasaun balun ne’ebé ko’alia lian inglés”.

Jornalista : Nelia Fernandes

Rafy           : Rafy Belo

HAKEREK NO HATÁN

Please enter your comment!
Please enter your name here