Prezidente Repúblika, Francisco Guterres Lú Olo, entrega bandeira RDTL ba Xefe Delegasaun Kontijente Atleta no ofisiál ba Jogu Sudeste Aziátiku (Sea Games) iha Filipina, novembru 2019, Mateus da Cruz. Imajen TATOLI/Cipriano Colo

DILI, 15 novembru 2019 (TATOLI)–Prezidente Repúblika (PR), Francisco Guterres Lú Olo husu atleta timoroan sira ne’ebé sei reprezenta Timor-Leste iha eventu internasionál Sea Games atu disiplina no hatudu talentu atu foti nasaun ne’e iha mundu.

Prezidente Repúblika husu ne’e, durante serimónia despedida ho kontijente atleta no ofisiál ba jogu sira Sudeste Aziátiku (Sea Games), iha Filipina,  novembru 2019, iha Salaun Xina, Palásiu Prezidente Nicolau Lobato, Bairru Pité, Dili, ohin.

Xefe Estadu hateten partisipasaun atleta timoroan iha eventu internasionál sira hanesan ne’e importante tebes atu bele tau no hatudu kapasidade téknika timoroan nian rasik, atu bele halo kompetisaun ho adversáriu sira.

“Maski imi-nia tempu preparasaun limitadu, maibé bainhira ita aseita ona atu bá, ne’e hatudu katak ita iha ona mak ita hakarak bá”, PR Lu Olo hateten.

Nia salienta, iha kompetisaun ida, bele dehan katak bele lakon no bele manán. Ida-ne’e sei hatudu iha rezultadu finál husi kompetisaun ida.

“Ha’u husu de’it ba alin sira maka ne’e, hatudu imi-nia talentu ba. Karik imi manán no lori medalla ruma, ne’e di’ak liután, tanba bele foti Timor-Leste nia naran sai boot. Tanba ne’e, imi bá lori nasaun nia naran, tenke hatudu disiplina. Kada modalidade buka hatudu imi-nia kapasidade. Ha’u fiar katak imi bele xa”, Xefe Estadu hameno.

Iha fatin hanesan, Ministra Edukasaun Juventude no Desportu, Dulce de Jesus aprezenta ba Prezidente Repúblika katak atleta no ofisiál sira ne’e mai husi modalidade 12 mak hanesan futeból, volei praia, atletizmu, silat, karaté, tiru, taekwondo, alterofelizmu, natasaun no tenis kampu.

“Atleta sira ne’e sei ba joga iha jogu nível sudeste aziátiku, Sea Games, iha Manila, Filipina. Totál Delegasaun Timor-Leste ne’ebé sei partisipa iha jogu internasionál ne’e hamutuk ema na’in 94, kompostu husi atleta na’in 70, iha feto na’in 12 no mane na’in 48. Iha mós ofisiál na’in 34 ne’ebé kompostu husi médiku, jornalista inklui ofisiál konfederasaun relevante sira”, Dulce relata.

Nia mós rekoñese katak durante preparasaun hasoru difikuldade oioin, maibé Ministériu Edukasaun Juventude no Desportu liuhusi Sekretaria Estadu Juventude no Desportu hamutuk ho Komité Olímpiku ho Federsaun Desportu sira halo ona esforsu maka’as atu oinsá delegasaun bele partisipa iha jogu ne’ebé sei hahú iha 30 novembru to’o 11 dezembru 2019.

Governante ne’e fiar katak maski ho limitasaun oioin, maibé esperiénsia hatudu katak Timor-Leste marka ona istória, hatudu ona ninia prestasaun iha Sea Games iha tinan hirak liubá, hanesan iha tinan 2011 iha Jakarta-Indonézia, tinan 2013 iha Myanmar, TL mós hetan osan mean, osan mutin no bronze.

“Ne’e nu’udár indikadór ida katak bainhira ita disiplina durante preparasaun liuliu treinu mo badinas, ita mós bele kompete no bele sai vensedór”, Dulce enkoraja atleta sira.

Nia mós informa ba Prezidente Repúblika katak totál orsamentu ne’ebé Governu aloka husi orsamentu jerál Estadu (OJE) 2019 ba eventu ne’e hamutuk $450.000 no durante preparasaun uza ona $100.000 no sei uza $350.000 ba partisipasaun iha eventu Sea Games.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here