Xefe Aldeia Kaimegoluli, Suku Leotala, Hermenegildo da Conçeição dos Santos. Imajen/Egas Cristovão.

LIQUIÇÁ, 15 novembru 2019 (TATOLI) — Suku rua, Assumanu no Leotala, iha Postu Administrativu Liquiçá Vila, Munisípiu Liquiçá, seidauk asesu eletrisidade.

Xefe Suku Assumanu, Bernardino Martins, hateten dezde uluk to’o oras ne’e ninia komunidade seidauk iha eletrisidade, maibé  tinan ida ne’e fahe ona solár painél 77 ba família balun.

Populasaun suku ne’e iha 2654 ne’ebé kompostu mane 1300-resin no feto 1300-resin ho xefe-família hamutuk 542.

“Suku Assumanu to’o ohin loron seidauk iha eletrisidade, ita uza hela meiu oioin. Iha tinan ida ne’e esforsu ita-nian konsege lori ona solár-painél 77 ba família, foin mak entrada novembru ne’e, ita halo ona distribuisaun, depois instala ba komunidade, ne’e primeira faze esforsu ne’ebé autoridade komunitária halo”, Xefe Suku ne’e informa ba Ajénsia Tatoli iha Administrasaun Munisipál Liquiçá, ohin.

Xefe Suku Assumanu, Bernardino Martins. Imajen/Tatoli Egas Cristovao

Autoridade Komunitária ne’e tenta hela ba faze daruak nian, nune’e abitante balun bele asesu ba solár painél ne’e.

Nia dehan, esforsu ida ne’e faze ba faze nune’e sira seluk ne’ebé hetan iha suku refere bele iha konsiderasaun.

“Agora, ita ko’alia kona-ba eletrisidade, ne’e kompeténsia ema boot sira, ema ne’ebé mak bele hola desizaun. Agora ita-nia preokupasaun ita aprezenta mas desizaun ne’e la’ós ita mak foti, ita-nia esforsu mak ita halo daudauk buat ki’ikoan sira ne’e”, katak nia.

Xefe Suku ne’e informa, Assumanu seidauk asesu ba ahi la’ós tanba jeográfika rai ka ema hadau-malu projetu eletrisidade, maibé projetu tama iha suku refere mak seidauk iha.

“Maibé ha’u esforsu hela, karik posivel 2021 hanesan ne’e bele rezolve problema eletrisidade ne’e tanba ita tenta maka dalan no eletrisidade”.

Suku Assumanu baliza ho suku Leorema, Darrulete, Leotela no Dato. Suku ne’e mós baliza ho Postu Administrativu Urahou, Munisípiu Ermera.

Purtantu Xefe Aldeia Kaimegoluli, Suku Leotala, Hermenegildo da Conçeição dos Santos, hateten maioria suku Leotala seidauk asesu ba eletrisidade.

“Aldeia tolu, Hatumasse, Manati, Kaimegoluli seidauk asesu ba eletrisidade, ahi-rin iha tiha ona maibé to’o agora la konsege dada”, informa Xefe Aldeia ne’e.

Maibé, aldeia Tolema no Lepa asesu ona ba eletrisidade. Totál populasaun iha aldeia ne’e iha 417, mane iha 209 no feto 208.

“Ami husu ba Governu bolu kompañia sira ne’ebé instala ona eletrisidade iha aldeia Hatumasse no aldeia sira seluk, tanba sá mak besi-rin latan hela no instalasaun tama uma hotu ona maibé seidauk hatama ahi, tanba ami hein hela”, hateten Xefe Aldeia Kaimegoluli ne’e.

Prezidente Autoridade Munisipál Liquiçá, Domingos da Conçeição dos Santos ‘Makaro’. Imajen/Tatoli Egas Cristovao.

Entretantu, Prezidente Autoridade Munisípiu Liquiçá, Domingos da Conçeição dos Santos, rekoñese suku rua ne’e seidauk asesu ba eletrisidade.

“Ita la’o neineik no la’o tuir kbiit Estadu ida ne’e ninian, tempu ida hotu-hotu sei asesu ba eletrisidade”, Prezidente Autoridade Munisipál ne’e informa ba autoridade lokál sira bainhira hala’o Reuniaun Konsellu Seguransa Munisipál (KSM), iha Administrasaun Munisipál.

Munisípiu Liquiçá iha Postu Administrativu tolu (3), Liquiçá Vila, Bazartete no Maubara. Postu Administrativu Liquiçá Vila iha totál populasaun 24140, Bazartete iha 30416 no Maubara 22,875 no iha suku hamutuk 23 ne’ebé iha porsentu 80 mak asesu ona ba elétrika.

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here