Foos Governu ne'ebé atu distribui ba apoiu sosiál. Imajen/MSSI

DILI, 15 novembru 2019 (TATOLI)-Diretór Sentru Solidariedade Sosiál no Inkluzaun Munisípiu Viqueque, Geraldo de Carvalho, rekoñese iha ninia funsionáriu balun fa’an  foos Governu ho dalan ilegál hodi benefisia ba interese pesoál.

“Iha momentu ne’e ha’u ba Dili,  ha’u la hatene. Ha’u fila hosi Dili mak Tribunál Distritál Baucau telefone ha’u katak ita boot  nia funsionáriu ida fa’an foos, ne’ebé ha’u mós hakfodak,” klarifika Diretór MSSI Viqueque, Geraldo de Carvalho, liuhosi komunikadu imprensa ne’ebé TATOLI asesu hosi mídia MSSI, ohin.

Daudaun ne’e, nia informa, kazu ne’e rejista ona iha Tribunál Distritál Baucau hodi hein prosesu tuir mai no funsionáriu ne’ebé fa’an foos ne’e hamutuk saka 70 ho kada saka kilograma 25.

“Momentu ne’ebá bainhira fa’an  PNTL Komandu  Postu Ossu kaptura no konsege lori autór  ba kumpre detensaun oras 72 nia laran,” Diretór ne’e fó sasin.

Iha  Kinta (14/11/2019), Ministra Solidariedade Sosiál no Inkluzaun, Armanda Berta dos Santos, halo inspesaun urjente ba armazén foos iha Munisípiu Viqueque hodi verifika loloos kazu ne’e akontese duni ka lae.

Ministra Armanda Berta dos Santos liuhosi komunikadu ne’e hateten, mezmu halo ona inspesaun, maibé seidauk simu relatóriu ofisiálmente hosi Diretór MSSI Munisípiu Viqueque ba informasaun ne’e.

“Ita haree to’ok  relatóriu mak bele foti desizaun tanba funsionáriu fa’an foos ne’e hahalok ne’ebé  ladún di’ak,” afirma Ministra Armanda Berta dos Santos.

Nia husu ba funsionáriu MSSI hotu-hotu atu labale uza sala sasán Estadu nian, liuliu la bele fa’an foos Governu ne’ebé rai iha armazén hodi tulun vítima dezastre naturaís no ema ki’ak sira.

Jornalista : Nelson Souza

Editór       : Francisco Simões

HAKEREK NO HATÁN

Please enter your comment!
Please enter your name here