Ikan Tilapia/Nila. Imajen/ Tatoli Egas Cristovao

MAUBARA, 14 novembru 2019 (TATOLI) — Institutu Nasionál Peska no Akikultura (NIFA, sigla inglés) Ministériu Agrikultura no Peska iha Maubara pontu fornese ikan-oan bainhira komunidade sira presiza atu hakiak.

Asesór Programa Peska NIFA (MAP), Lee, Jung-Uie, Imajen/Tatoli Egas Cristovao.

Asesór Programa Peska iha NIFA, Lee, Jung-Uie, hateten iha tinan kotuk prodús ona ikan oan hamutuk rihun 300-resin no distribui ona ba akikultór sira hamutuk rihun 150 no tinan ne’e kontinua prodús.

“Ami iha ne’e loroloron distribui hela de’it ba akikultór sira”, dehan nia ba Ajénsia Tatoli, ohin.

Nia esplika molok atu asesu ba ikan-oan iha Maubara, dahuluk prienxe formuláriu ne’ebé prepara hosi Ministériu Agrikultura no Peska (MAP) Munisipál Liquiçá ba sira ne’ebé hela iha ne’ebá no husi munisípiu seluk bele foti formuláriu iha MAP Dili iha Diresaun Jerál Peska.

Formuláriu ne’ebé prepara husi MAP mak akikultór (ema ne’ebé hakiak ikan) tau naran grupu ka pesoál, total ikan hira mak presiza, suku, postu administrativu, munisípiu no númeru telemovel. Nune’e mós presiza aprezenta kona-ba medida tanke no totál tanke ne’ebé atu hakiak ikan.

Nune’e dezde NIFA estabelese iha 2018, husi munisípiu sira mai foti ona fini ikan eseptu husi Oe-Cusse no Ataúro de’it mak seidauk. “Sira mai foti gratuita tanba hatene ne’e Governu nian”.

Ikan-oan ka fini ikan Tilapia ne’ebé hakiak daudaun ne’e iha tipu tolu mak burnstock kuaze 2000, fingerlins ki’ik iha rihun 100 no next generation kuaze 2000.

“Agora, ita prodús ikan lele no ikan mas nia oan no ita mós iha ikan salmon no tinan oin ami prepara atu prodús ida ne’e”.

Iha kontestu dezenvolvimentu peska no agrikultura durante dékada tolu nia laran ema millaun 1.2-resin iha Timor-Leste mak hela iha área rurál, barak liu mak moris hanesan agrikultór hodi sustenta sira-nia moris.

Timoroan ne’ebé moris iha área rurál hetan sofrimentu ba má nutrisaun, espesialmente ba inan isin-rua no labarik sira. Sira presiza aumenta asesu ba fonte hahán animál, espesialmente hakiak ikan ne’ebé mak konsidera importante liu hodi hadi’a estatutu nutrisionál atu nune’e populasaun sira iha proporsaun balansu nutrisionál.

Tanba ne’e, NIFA iha vizaun no misaun fornese ikan ba komunidade, nune’e bele hetan proporsaun balansu nutrisionál.

Produtu akuatiku reprezenta opurtunidade importante hadi’a diversidade dieta no estatutu nutrisionál.

Governu identifika dezenvolvimentu peska no akikultura hodi hadi’a seguransa ai-han no nutrisionál hodi aumenta lukru ba família ne’ebé hela iha área rai-maran no área kosteira.

Planu Estratéjiku Dezenvolvimentu Nasionál (PEDN) 2011-2030 foka liu ba importánsia akikultura hodi aumenta konsome proteína hodi hasa’e lukru.

Tékniku NIFA (MAP), Silveiro Pereira Mendes. Imajen/ Tatoli Egas Cristovão.

Silveiro Pereira Mendes hanesan tékniku iha NIFA, hateten fatin ne’e hanesan treinamentu ba peska, fatin hakiak no fornese ikan ba komunidade ne’ebé presiza.

“Ikan ne’ebé hakiak iha NIFA lori hosi Maliana no Same hamutuk ikan-oan 40-resin no oras ne’e sai barak. Institutu ne’e hakiak espésie tolu hanesan tilapia/nila, lele no ikan mas, agora ikan-oan sa’e rihun 300-resin ona”, katak nia.

NIFA harii tiha ona hanesan institutu peska nasionál iha fevereiru 2018 ne’ebé suporta husi Korea International Cooperation Agency (KOICA) ho nia funsionáriu hamutuk 25.

Jornalista : Evaristo Soares Martins

Editora : Maria Auxiliadora

HAKEREK NO HATÁN

Please enter your comment!
Please enter your name here