Estádiu Dili. Foto Google.

DILI, 14 novembru 2019 (TATOLI) – Governu liuhosi Konsellu Administrasaun Fundu Infraestrutura (CAFI, sigla portugés), sei reúne hodi deside hapara kontratu empreza Marino Enterprises ne’ebé inkapasidade finanseira hodi kontinua implementa ba reabilitasaun estádiu munisipál Dili.

Tuir ajenda ne’ebé Tatoli asesu katak reuniaun ne’e sei realiza, sesta (15/11), iha auditóriu Xanana Gusmão Ministériu Finansa, Aitarak-Laran. Iha biban ne’e, CAFI sei aprezenta relatóriu averiguasaun ba projetu reabilitasaun estádiu Dili ne’ebé konsidera atrazu ba ezekusaun obra.

Liuhosi análize ne’ebé iha katak estádiu Dili sai fasilidade ne’ebé krusiál ba preparasaun no susesu hosi eventu futeból hosi Comunidade dos Países de Língua Portuguesa (CPLP) sira, nune’e presiza tau importánsia, nune’e, tuir avaliasaun téknika, empreza refere laiha kapasidade finanseira hodi kontinua implementa obra ne’e.

Tanba ne’e, rekomendasaun Pré-CAFI iha enkontru aban, maka selu adisionál ba empreza refere no hapara nia kontratu, Sekretária Estadu Juventude no Desportu (SEJD) hamutuk ho Ministériu Obra Públika (MOP) no Ajénsia Nasionál Dezenvolvimentu (AND) sei halo site visit ka inspesaun iha tereenu hodi hapara kalkulasaun materiál kontrusaun ne’ebé empreza sosa ona no pagamentu bazeia ba rezultadu verifikasaun, enkuantu, sei halo konkursu foun liuhosi aprovizionamentu ne’ebé sei diskute filafali.

Maske nune’e, Governu konsege ona selu ho porsentu 70, maibé to’o ohin loron seidauk finaliza, no konstrusaun estádiu Dili, hahú iha 2015, ne’ebé kaer hosi empreza lokál, Marino Entreprises, Lda, ho valór millaun $1,5.

Iha sorumutu aban, sei hola prezensa hosi Ministru MOP, Salvador Eugénio Soares dos Reis Pires, Ministru Transporte no Komunikasaun, José Agustinho da Silva, Ministra Finansa ein ezersísiu, Sara Lobo Brites, Vise-Ministru Administrasaun Estatál, Abilio José Caetano, Sekretáriu Estadu Asuntu Kombatente Libertasaun Nasionál, Gil da Costa Monteiro “Oan Soru”, Sekretáriu Estadu Komunikasaun Sosiál, Merício Juvinal dos Reis “Akara” no Sekretáriu Estadu Juventude no Desportu, Nélio Isaac Sarmento.

Entretantu, reuniaun ordináriu CAFI sei halo aprezentasaun ba pontu sira ne’ebé atu inklui liuhosi pontu situasaun ba projetu Fundu Insfraestrutura (FI) 2019, maka klasifikasaun no ezekusaun ba projetu FI sira, projetu sira iha 2019, kompromisu no kontinuasaun, atualizasaun ba implementasaun progresu fíziku projetu FI no atualizasaun aprovizionamentu ba projetu FI.

Jornalista : Zezito Silva
Editora : Maria Auxiliadora

HAKEREK NO HATÁN

Please enter your comment!
Please enter your name here