Xefi Suku Maumeta Liquiçá, Victor da Silva, Imajen/Tatoli Egas Cristovao

LIQUIÇÁ, 14 novembru 2019 (TATOLI) –  Maumeta, suku ida iha Liquiça, hala’o ona atividade tara-bandu dezde uluk hodi la tesi ai arbiru ne’ebé tuir Xefe Suku, Victor da Silva, importante tebes tanba kontribui hodi hamatak ambiente florestál.

Suku Maumeta ne’ebé pertense ba Postu Administrativu Bazartete, Munisípiu Liquiçá halo atividade tara-bandu ne’e hahú iha 2005 bainhira Victor lidera suku ne’e.

Maumeta iha xefe família hamutuk 761 no totál populasaun 3659 kompostu hosi mane 1784 no feto 1875. Suku refere ho ninia luan área 6,88km2.

Suku Maumeta iha aldeia haat (4) hanesan Maumeta Lau, Darumudapu, Kaimehohou no Nartutu.

Aldeia Maumetalau iha xefe família 106 no totál populasaun 524 kompostu hosi mane 264 no feto 260. Aldeia Darumudapu iha xefe família 195 no totál populasaun 896 kompostu hosi mane 428 no feto 468. Aldeia Kaimegohou iha xefe família 146 no totál populasaun 705 kompostu hosi mane 351 no feto 354. Purtantu aldeia Nartutu iha xefe família 314 no totál populasaun 1534 kompostu hosi mane 741 no feto 793.

“Ami-nia ai-bubur sira ne’e iha 2005 hela de’it nia lolon boot, ema tesi hotu, hosi ne’ebá ami tara-bandu to’o agora, ai-bubur ne’e matak no halo ambiente florestál iha suku Maumeta matak, maibé bailoron naruk ne’e mak halo ha’u triste”, dehan nia ba Ajénsia Tatoli ha Rua 5 Abríl 1999, sede Suku Maumeta, kuarta ne’e.

Hosi 2005 mai ne’e kontinuasaun re tara-bandu katak iha tempu ne’ebé bandu labele taa ai arbiru no iha tempu ne’ebé fó ba kintál na’in bele tá.

“Tinan-tinan ami halo iha novembru atu ba dezembru ami tenke halo re tara bandu, ne’ebé agora ami husik para ema bele tá ai balu hodi bele hadi’a lutu no halo animál nia luhan depois tama ba dezembru ami bandu filafali katak labele book ona”, tenik nia.

Xefe Suku Maumeta ne’e informa, bainhira ema ruma taa estraga ai, nia tenke multa dolar $25 no bibi ida ba administrasaun suku, dalaruma bele to’o dólar $100, depende ba sala ne’ebé ema ida ne’e komete iha área suku refere. Osan ne’e rasik sei gasta fali iha atividade re tara-bandu.

“Ami iha estrutura ida ba bandu ne’e ketak, nia hamriik independente, so ké ami mak fó orientasaun. Ami iha regulamentu katak iha tempu taa ai seidauk to’o maibé husu atu taa, entaun ‘Kableha’ (ekipa guarda tara-bandu nian) ba haree katak ai ida ne’e o bele taa, maibé ida ne’e no ida ne’ebá labele”.

Xefe Suku ne’e realsa, iha área turizmu tasi-ibun Maumeta bandu maka’as joven feto no mane komete atividade imorál, maibé konversa, halimar, paseiu la bandu.

Bainhira ema ruma liuhosi suku refere labele book ai-tahan sira no labele lori katana taa halimar ai-bubur ka kualkér ai saida de’it.

“Se ó lori o-nia bibi ba fa’an iha merkadu, maibé ó liuhosi área Maumeta mak o hasai ai-tahan fó ba ó-nia bibi iha momentu bandu ne’e ó multa dólar $25”, hateten Xefe Suku Maumeta.

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here