Kontra-atake entre jogadór Inur Transforma FC no Karau Fuik FC. Imajen Mídia LFA

DILI, 13 novembru 2019 (TATOLI)–Treinadór klube Terseira Divizaun, Inur Transforma FC, Carlito da Cruz hateten Inur partisipa iha Liga Futeból Amadora (LFA) atu gaña vitória, maibé la’ós uza estratéjia tik-tak hodi anima adeptu sira.

Tanba ne’e, mak ohin ekipa refere hatudu duni jogu ne’ebé ho estratéjia kontra-atake maka’as hasoru nia adversáriu Karau Fuik FC, iha ne’ebé konsege manán ho rezultadu 2-0 iha jogu kontinuasaun Terseira Divizaun LFA époka 2019 ne’ebé hala’o iha Kampu Federasaun Futeból Timor-Leste (FFTL), Bairru Formosa, Dili, kuarta ne’e.

“Inur mai partisipa iha Liga ne’e atu manán, la’ós mai atu hatudu de’it tik-tak hanesan Barcelona hodi anima adeptu sira. Ida-ne’e ami lae! Ami hakarak manán! Ohin manán tan,” Carlito tenik.

Entretantu, treinadór Karau Fuik FC, Gaspar Amaral rekoñese nia ekipa la hatudu duni jogu ne’ebé mak di’ak hodi rezulta nia ekipa lakon.

“Ami ohin ne’e jogu ladi’ak duni. Maibé, ba oin, hanesan treinadór, ha’u sei hadi’a di’ak liután ami-nia jogu. Jogu hanesan ne’e sempre iha lakon no manán,” treinadór ne’e haktuir.

Golu vitória Inur prodús hosi jogadór Marcos Casimiro iha minutu 32 no Francisco Tilman iha minutu 77.

Jogu refere dirije hosi árbitru Romário Malitety, juiz liña Juviano Reis, Pedro Braga no árbitru rezerva, Artur Belo.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here