Ministra Saúde en ezersísiu, atuál Vise Ministra ba Kuidadu Saúde Primáriu, Élia António de Araújo dos Reis Amaral. Imajen Egas Cristovão

DILI,13 novembru 2019 (TATOLI)-Ministériu Saúde (MS) konvida ona administradór lokál liuliu munisípiu 12 inklui RAEOA (Rejiaun Autonoma Espesiál Oe-Cusse, Ambeno)  atu iha responsabilidade ba iha kada aldeia no mós kada suku atu nune’e bele hatutan ba kada xefe família sira, liuliu sira-nia uma fatin atu hamoos bee lihun sira, hamoos fo´er sira iha uma sorin hodi tau iha lixu fatin atu evita susuk bele tolun no moris ba.

“Durante fulan rua liu ona, udan mós monu rai, pesoál saúde sira tama sai aldeia no suku fahe ona abate  ba inan aman sira para tau iha haris fatin no sira mós tau ba kolan ninin sira ne’ebé mak iha preokupasaun ba susuk sira ne’e,” Vise-Ministra Kuidadu Saúde Primária, Elia dos Reis Amaral ba Ajénsia TATOLi bainhira ramata partisipa serimónia tomada posse ba Prezidente RAEOA, iha Palásiu do Governu, ohin.

Governante ne´e mós husu ba autoridade lokál sira atu bele identifika lixu sira ne’ebé mak populasaun soe hamutuk depois traballadór lixu sira mai ra´ut kalan ka dader madrugada bele fase mós tiha lixu fatin atu nune’e susuk mós la bele hobur no la bele tolun.

Hanesan mós haris fatin nian hamoos kada loron rua hodi fase para labele kria susuk tolun iha bee laran hanesan mós uma sira ne’ebé tau ai-funan barak hanesan roda kuda ai-funan ida ne’e mos sira haree didi´ak tanba Ministériu Saúde mó informa ona ba komunidade katak rega ai-funan sira, depois rega roda sira ne’ebé mak kuda ai-funan ba hamoos didi´ak para susuk la bele tolun iha laran.

“Ida ne’e mak ami tenta ona posibilidade saida mak atu halo no ikus inan isin rua sira hanesan dahuluk gravida entaun sira ba sentru saúde sira atu halo vasina sira mós hetan muskateiru atu husu ba sira atu taka muskateiru para antes toba ka depois toba uza moskateiru refere para susuk la bele ataka sira”.

“Aleinde ne’e mós uza replente ka bahasa indonézia dehan Autan ne’e mós kose ba isin para evita susuk labele tata no mós liuliu ba inan isin rua sira para tau mós atensaun hodi la bele afeita mós ba bebé,” esplika Vise-Ministra Kuidadu Saúde Primária, Elia dos Reis Amaral.

Nia esplika liután katak sintoma moras dengue ne’e mai husi isin-manas, isin -baruk kabun moras, isin-manas la tun liuliu iha magdrugada no kalan, raan sai husi inus nnomós moras liu oras 24. Isin manas nafatin tenke lalais ba sentru saúde no postu saúde ne’ebé besik hodi halo prevensaun antes duke halo kurativu.

“Oitavu Governu liuhusi Ministériu Saúde fulan rua liubá prepara ona polítika oinsá atu redús ba moras dengue tanba antes udan monu rai ita mós oinsá atu halo prevensaun sedu,” konklui Vise-ministra

Jornalista : Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here