Primeiru Ministru, Taur Matan Ruak kaer liman ho Prezidente Autoridade RAEOA-ZEEMS foun, José Luís Guterres.Imajen Tatoli/António Gonçalves

DILI, 13 novembru 2019 (TATOLI) – Hafoin simu pose nu’udar Prezidente Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), José Luís Guterres ‘Lugu’, hateten nia parte laiha meta traballu atu atinji iha loron hira nia laran, maibé hakarak kompleta estrutura.

“Ha’u la servisu konforme loron ida, loron rua ka depois de 100 dias, servisu ne’e hanesan ita iha planu ida dahuluk ami sei kompleta formasaun ekipa ba rai Oé-Cusse. Ami sei tuur hamutuk hodi halo diskusaun no rona autoridade ne’ebé uluk kaer governasaun iha rai Oé-cusse, para que ita bele halo aktividade ba buat ne’ebé halo tiha ona no ba buat ne’ebé ladi’ak ita kurriji, hanesan Primeiru-Ministru dehan buat ne’ebé di’ak oituan ita halo di’ak liu tan ba benifísiu Povu Oé-Cusse”, tenik Lugu iha Palásiu Governu, kuarta ne’e.

Nia dehan presiza konsulta mós ho líder Aliansa Mudansa ba Progresu (AMP) ne’ebé kompostu hosi partidu CNRT, PLP no KHUNTO, tanba aliansa ne’e maka daudaun ne’e kaer ukun.

“Ha’u presiza halo reuniaun no konsulta ho líder partidu ne’ebé kompoin hosi AMP tanba desizaun ida-ne’e husi AMP iha reuniaun dahuluk antes formasaun Governu, AMP deside iha altura ne’ebá katak ema se maka sei asume kna’ar hanesan Prezidente RAEOA”, nia akresenta.

Lugu hetan fiar lidera RAEOA-ZEESM bazeia ba Proposta Rezolusaun Governu ne’ebé aprezenta husi Primeiru-Ministru, Taur Matan Ruak no hetan aprovasaun liuhosi reuniaun Konsellu Ministru iha loron 6 novembru.

“Ita iha rai Repúblika Demokrátika Timor-Leste (RDTL) hanesan Estadu Unitáriu no Xefe Governu ida de’it, tanba ne’e ha’u mai mós (lidera RAEOA) hanesan rekomendasaun husi Primeiru-Ministru. Iha hanoin balun entre Governu Sentrál no RAEOA atu serbisu hamutuk”, nia dehan tan.

Antes José Luís Guterres simu pose hodi Governu, iha loron 8 jullu Parlamentu Nasionál halo alterasaun ba artigu 21º lei númeru 3/2014 kona-ba kriasaun RAEOA-ZEESM.

Antes vigora, artigu 21º deskreve katak Prezidente RAEOA hetan aprovasaun no pose husi Prezidente Repúblika, liuhusi proposta Primeiru-Ministru, maibé bainhira halo ona alterasaun ba artigu ne’e, simplesmente Primeiru-Ministru maka hato’o Proposta Rezolusaun hodi hetan aprovasaun liuhosi deliberasaun Konsellu Ministru, hafoin Xefe Governu rasik maka fó pose liuhosi Rezolusaun Governu.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here