Prezidente Komisaun Funsaun Públika (CFP-sigla portugés), Faustino Cardoso Gomes. Imajen/Antonio Goncalves

DILI, 13 novembru 2019 (TATOLI)Lideransa partidu polítiku (Parpol) balun halo tentativa hodi intervein ba servisu Komisaun Funsaun Públiku (CFP-sigla portugés) iha ámbitu  prosesu promosaun grau, rejime karreira jerál ba Funsionáriu Públiku (FP).

Prezidente KFP, Faustino Cardoso Gomes, afirma, instituisaun Estadu sira konxiente hela atu hadook-aan hosi tentasaun barak-barak, maibé iha lider parpol balun  tenta atu influensia ho nia podér polítiku ba mekanizmu sira ne’ebé tenke la merese ba kompeténsia partidu polítiku sira nian.

“Ha’u simu telefone barak, mais ha’u dehan ba komisáriu sira lalika preokupa. Ita la’o ba oin nafatin, tanba balun tenta atu politiza. Ha’u dehan, tenta atu politiza la’ós haree ba kór, mais halo aproximasaun ho kór polítika tenta buka kondís oinsá maka fó rezultadu ruma,” afirma Prezidente KFP, Faustino Cardoso Gomes, ohin, bainhira fó sai rezultadu promosaun grau  ba Funsionáriu Públiku sira iha Salaun Ministériu Solidariedade Sosiál no Inkluzaun (MSSI), Caicoli, Dili.

Mezmu simu kontaktu barak, maibé Prezidente KFP ne’e,  lakohi fó sai identidade hosi lider Parpol ne’ebé tenta intervein ona iha prosesu promosaun iha fulan rua kotuk.

Nia tenik tan,  prosesu promosaun  ne’e, hala’o ho independente,  profisionál no imparsialidade tanba sistema teste ne’e halo ho  eletrónika no  hetan kontrolu másimu.

“La iha sistema família no manipulasaun iha prosesu ida ne’e, tanba ema hotu-hotu sente ho orgullu tuir idak-idak nia kapasidade rasik,” Faustino hateten.

Ho akontesimentu ne’e, Prezidente Komisaun Funsaun Públika ne’e, husu ba diretór iha liña ministériu ida-idak atu kontrola servisu Funsionáriu Públiku atu labele  prátika atividade partidu nian iha servisu fatin.

“Ita tenke asegura ita nia integridade profisionalizmu hanesan Funsionáriu Públiku,” afirma Faustino Cardoso Gomes.

Eis Prezidente Komisaun Nasionál ba Eleisaun (CNE-sigla Portugés) ne’e realsa tan, promosaun ne’e nu’udar parte ida  hodi reforma servisu administrasaun rekursu umanu Estadu nian bele la’o di’ak liután.

Biban ne’e, Faustino Cardoso, hato’o parabéns ba ekipa juri tanba konsege realiza ona promosaun grau ba funsionáriu 9.350 no sira ne’ebé pasa iha promosaun ne’e hamutuk 1.354.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here