Ministru Transporte no Komunikasaun, José Agustinho da Silva. Imajen Tatoli/Egas Cristóvão

DILI, 13 novembru 2019 (TATOLI) – Atu organiza transporte públiku iha kapitál Dili, Governu liuhosi Ministériu Transporte no Komunikasaun iha ona hanoin atu halo konstrusaun terminál ba transporte públiku iha parte Hera, Manleuana no Tibar, maibé daudaun ne’e iha faze estudu viabilidade.

Ministru Transporte no Komunikasaun, José Agustinho Da Silva, rekoñese durante ne’e terminál sai preokupasaun públiku, tanba ne’e iha ona inisiativa hodi hahú prosesu.

“Daudaun ne’e ita hahú ho estudu viabilidade, tanba liuhosi estudu ne’e maka orsida define nia kustu hira. Presiza mós ninia planu investimentu ne’ebé prosesu la’o hela”,  tenik Ministru José Agustinho iha Palásiu Governu, kuarta ne’e.

Tuir governante ne’e, iha estasionamentu parte Becora sei muda ba Hera, parte rai-klaran sei muda ba Manleuana, no parte oeste sei halo iha Tibar

Nia dehan, terminál hirak ne’e atu muda ho razaun atu loke espasu ba sidade Dili ne’e sai luan liután, inklui terminál balun tanba besik sítiu istóriku.

“Ita tenke muda sai terminál liliu iha parte Tasi Tolu tanba fatin ne’e nu’udar sítiu nasaun nian no parte istóriku eventu nasionál sira sempre realiza iha ne’ebá. Tanba ne’e presiza  konserva, entaun ita tenke muda sai ba Tibar. Loke terminál iha fatin hirak ne’e ninia vantajen maka espasu iha sidade Dili nian halo luan, ne’ebé fó espasu ba ita nia transporte públiku nia movimentasaun no parte ida bele aumenta sira nia kresimentu ekomomia”, nia akresenta.

Iha orsamentu 2020, prevee estudu viabilidade ba konstrusaun terminál hodi aselera prosesu planu mestre.

“Orsamentu ba estudu viabilidade ita hatene ninia valór labele ekivalente ho valór konstrusaun, ne’ebé ita haree númeru ne’ebé sufisiente atu  bele aloka no bele fasilita prosesu estudu viabildade”, nia salienta.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here