Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur. Imajen Tatoli/Egas Cristóvão

DILI, 13 novembru 2019 (TATOLI)–Komandu FALINTIL-Forsa Defeza Timor-Leste (F-FDTL) ho Polísia Nasionál Timor-Leste (PNTL) sei foti desizaun ba komandante iha unidade balun instituisaun PNTL nian, tanba deskonfia apoiu membru sira baku malu.

Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál Lere Anan Timur hato’o kestaun ne’e hafoin enkontru ho Prezidente Repúblika (PR), Francisco Guterres Lú Olo, ohin, iha Palásiu Prezidente Nicolau Lobato, Bairru Pité, Dili, relasiona ho problema entre membru Polísia Militár (PM), ho membru Bataliaun Órden Públika (BOP) foin lalais ne’e.

Lere konta tuir katak kazu baku malu ne’e mambru sira rasik rezolve tiha ona. Membru sira ho inisiativa rasik hakarak atu halo konferénsia imprensa hodi rekoñese sira-nia sala no husu deskulpa ba públiku kona-ba hahalok ne’ebé sira halo iha públiku.

“Sira hakarak atu esklarese ba públiku katak problema hotu ona no ami hakarak serbisu hamutuk, maibé sira-nia komandante balun mak lakohi. Nia (komandante ne’e) mak dehan lalika halo diálogu no lalika halo konferénsia imprensa. Ha’u dehan ita komandante ne’e ita sorte ona tanba ita-nia membru sira rezolve problema. Ha’u ho komandante PNTL sei haree kazu née ho sériu”, Lere hateten.

Lere hatutan, sei haree kazu ne’e ho sériu tanba komandu mak manda, iha ierárkia militár ne’e atu sala ka loos tenke kumpre.

“Uluk iha ai-laran, bainhira ha’u fó órden dehan o sei mate, soldadu ne’e aseita duni katak nia sei mate tanba órden komandu. Maibé, ha’u haree ohin loron buat hotu di’ak ona, ita la hatudu ita-nia profisionalizmu, tanba ne’e komandante ida iha okos, manda fali komandu. Komandante sira hanesan ne’e di’akliu lalika sai komandante”, nia salienta.

Lere mós fó ezemplu katak uluk ninia Komandante PM, Haksolok, la kumpre órden, Lere hasai tiha husi Komponente Polísia Militár.

“Uluk ha’u haruka Komandante PM, Haksolok, ba lidera Polísia Militár, nia veteranu ida, maibé la kumpre órden ha’u dehan o sai, tau fali komandante seluk. Ha’u fó hanoin tan bainhira rezultadu husi investigasaun kazu ne’e hatudu katak membru PM halo duni irregularidade no komandante la fó sansaun, ha’u sei hasai tan. Ita lutu nasaun mak fasilita hodi halo buat hanesan ne’e, hatudu katak ita lakohi atu ita-nia nasaun sai di’ak,” eis líder rezisténsia ne’e haktuir.

Kona-ba kazu ne’e rasik, Lere dehan, ekipa konjunta kontinua halo investigasaun. Bainhira konklui ona sei relata mai komandu atu haree sé mak sala no sé mak loos, maibé Lere fó sala ba Polísia Militár tanba baku.

“Tuir ha’u nia haree katak PM sala tanba PM baku”, Lere afirma.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here