Sekretáriu Administrasaun Munisipál Liquiçá, Renato Nunes Serrão. Imajen/Tatoli Egas Cristovao

LIQUIÇÁ, 13 novembru 2019 (TATOLI) – Governu responde ona dezastre naturál ne’ebé afeta ba família hamutuk 312 ne’ebé akontese iha 2016-2018, iha Postu Adminstrativu Liquiçá, Maubara no Bazartete, Munisípiu Liquiça nian.

“Fó ona apoiu ba sira kalén, simentu, besi, pregu, ai, depois mão de obra”, Sekretáriu Munisipál Liquiçá, Renato Nunes Serrão, ba Tatoli, ohin.

Tulun ne’e fó ba família afetada sira iha Maubara hamutuk 73, Bazartete 81 no Likisá mak barak ho totál família 158.

“Agora, ida 2019 ne’e mak Primeiru-Ministru orienta hela no foin ministru bolu fali ami enkontru tanba Primeiru-Ministru hakarak dadus lalais, soké ami aprezenta ne’e problema sosiál tanba balun 2016, 2018 iha Liquiçá seidauk hetan, se ita fó fali agora, sira kestiona nusá mak ami-sira uluk seidauk, ne’ebé ami tenke enkaixa sira 2018 se 2019 fó, sira (vítima 2018) mós fó para lalika iha problema sosiál”, haktuir Renato.

Tanba ne’e, levantamentu dadus kobre hotu para hato’o ba Governu oinsá hakarak rezolve ho orsamentu ne’ebé seidauk ezekuta hotu.

Kona-ba dezastre ne’ebé akontese iha 2019 ne’e, iha suku rua iha Postu Administativu Liquiça mak Aço-Mano iha umakain 56 ne’ebé husi ne’e uma 20 mak ahi han no 36 anin mak sobu no Leotala iha família 33 ne’ebé anin mak sobu mós uma, totál iha uma 89.

“Maibé, ami atu fó mós dadus 2018 nian tanba foin daudauk fahe (ajudu ne’ebé fó iha semana kotuk) balun seidauk hetan, depois iha 2019 sira mós bele simu para evita problema sosiál”, katak.

Sobre kauza ahi-han uma ne’e, Renato dehan Primeiru-Ministru orienta ona Polísia, no Protesaun Sivíl para bele serbisu hamutuk ho autoridade hodi identifika akontesimentu ne’ebé akontese ne’e tanba dezastre naturál ka iha aktu indivíduu.

Nune’e, prosesu la’o hela no karik ne’e tanba hahalok indivíduu, ema ne’ebé halo labele hetan tulun tanba hakarak muda ema nia mentalidade.

“Governu bele fó atensaun ba nia povu katak ne’e afeta husi dezastre naturál, se ita mak halo (sunu), ita mak kontribui ne’e labele”, Renato dehan.

Jornalista : Evaristo Soares Martins

Editora : Maria Auxiliadora

HAKEREK NO HATÁN

Please enter your comment!
Please enter your name here