Prezidente KI, Virgílio Guterres (Karuk), Asesor UNESCO ba Komunikasaun no Informasaun Jakarta, Lim Ming Kuok(Klaran) no Prezidente AJTL, David Hugo (Loos), hafoin abertura treinamentu “Media and Climate Change”. Imajen/TATOLI

DILI, 13 novembru 2019 (TATOLI) – Asosiasaun Jornalista Timor-Leste (AJTL) hamutuk ho United Nations Educational, Scientific and Cultural Organization (UNESCO) fó formasaun ba jornalista, estudante komunikasaun sosiál, organizasaun naun governamentál na’in-20 hodi hasa’e koñesimentu atu kobre asuntu mudansa klimátika.

Formasaun ne’e ho objetivu atu hasae kapasidade jornalista sira-nian, atubele iha koñesimentu kle’an hodi halo kobertura ba iha asuntu mudansa klimátika.

Problema mudansa klimátika ne’e sai preokupasaun ba ema iha era globalizasaun, tanba fó ameasa ba ema no animál nia moris, ezije ema hotu, liuliu Estadu no Governu atubele kuidadu liután ambiente .

“Ita husu para jornalista sira mós iha atensaun másima ba iha problema mudansa klimátika ne’ebé mak akontese ona, atubele halo kobertura no tau aas asuntu ambiente, hodi oinsá bele publika informasaun no halo advokasia ba públiku kona-ba impaktu hosi mudansa klimátika”, Prezidente Konsellu Imprensa Timor-Leste, Virgílio Guterres, afirma iha ámbitu abertura treinamentu Media and Climate Change, iha salaun Asosiasaun HAK, Farol, ohin.

Prezidente KI friza importante tebes formasaun tanba bele hasa’e kapasidade jornalista sira hodi kobre asuntu mudansa klimátika.

“Mudansa klimátika afeta ema nia vida liuliu iha setór agrikultura, saúde”, katak.

Nia dehan, institusaun mídia sira dala barak kobre asuntu polítika, maibé ladún kobre ba asuntu mudansa klimátika iha Timor-Leste.

“Ita hanesan jornalista verifikasaun, konfirmasaun no klarifikasaun, molok publika notísia ida liuliu ba asuntu mudansa klimátika”, sujere.

Prezidente AJTL, David Hugo, agradese ba UNESCO ne’ebé apoia treinamentu “Média and Climate Change (Mídia ho Mudansa Klimátika).

“Husu ba jornalista sira atu tuir formasaun ne’e ho di’ak hodi hasa’e koñesimentu hodi hala’o kobertura ba isu-isu asuntu mudansa klimátika no nia efeitu ba umanu”, Prezidente ne’e hato’o.

Hodi espera hafoin treinamentu ne’e, jornalista sira bele hala’o kobertura ba hahalok no efeitu husi mudansa klimátika hodi sai edukasaun ida atu populasaun bele iha konxiénsia hodi asegura ambiente”, afirma.

Nia dehan, dala barak instituisaun midia sira halo publikasaun barak liu asuntu polítika, maibé liuhusi formasaun ne’e bele fó mós importánsia ba kobre mudansa klimátika tanba afeta ba saúde umana.

Asesór UNESCO ba asuntu komunikasaun no informasaun, Lim Ming Kuok, dehan UNESCO hakarak apoia AJTL atu fó formasaun ne’e tanba mudansa klimátika importante tebes atu ema hotu hatene liuliu efeitu no kontribuisaun sira.

“Ita hakarak fó formasaun ne’e atu jornalista sira bele halo kobertura ba tempu, iklima no mudansa klimátiku,”, nia salienta.

Matéria espesífika hahú 13 to’o 16 novembru ne’e atu partilla oinsá jornalista sira bele komprende previzaun tempu, iklima no kontribuisaun umana ba mudansa klimátika no efeitu sira. Formadu 20 ne’e husi instituisaun mídia online, imprime, eletróniku no universitáriu sira.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here