Fatin Turizmu Maumeta Beach Munisípiu Liquiçá.Imajen/Tatoli Egas Cristovao

LIQUIÇÁ, 13 novembru 2019 (TATOLI) — Administrasaun Munisípiu Liquiça, iha ona hanoin reabilita fatin turizmu iha área suku Maumeta, Postu Administrativu Bazartete, Munisípiu Liquiçá.

Projetu turizmu ida iha área Lakapogoa, suku Maumeta, Postu Administrativu Bazartete, oras ne’e ho kondisaun aat.

Projetu ne’e na’in mak Ministériu Turizmu iha V Governu Konstitutisionál no jere hosi kompañia MIFA Unip, Lda, iha 2013 ho orsamentu montante rihun $280-resin. Projetu ne’e hanaran Projetu Dezenvolvimentu Integradu Munisipál (PDIM).

Sekretáriu Administrasaun Munisipál Liquiçá, Renato Nunes Serrão. Imajen/Tatoli Egas Cristovao.

“Ami hanoin ona atu hadi’a fatin ne’e, maibé ita labele tama kuandu buat ne’e seidauk fó kompeténsia mai ita, maibé ami tau nafatin responsabilidade hodi tau-matan. See ita hakarak investimentu, signifika fatin ne’e ita tenke tau seguransa,” Renato Nunes Serrão ko’alia iha administrasaun munisipál Liquiçá, ohin.

Nia haktuir, projetu turizmu ne’e laiha kontinuasaun tanba Governu sentrál kansela tiha Planu Dezenvolvimentu Integradu Munisipál (PDIM).

Hodi hatutan pojetu ne’e seidauk desentraliza kompeténsia ba munisípiu tanba polítika ne’e Ministériu Turizmu nian.

“Ami durante ne’e ezije kria kondisaun di’ak para depois ita investe iha área turizmu para konkista ita-nia bainaka sira hosi li’ur depois ba futuru ami prepara hela polítika desentralizasaun, ne’e hanesan retornu ida aban bainrua bele kontribui reseita ba munisípiu”, katak nia.

Diretora Kompañia MIFA, Fátima Gonçalves dos Santos. Foto/Egas Cristovão.

Iha parte seluk, Diretora Kompañia MIFA Unip, Lda, Fátima Gonçalves dos Santos, haktuir projetu ne’e hala’o iha 2013 ho montante orsamentu rihun $280-resin.

“Orsamentu ne’e ami kuaze gasta ba obra ne’e, servisu ne’e ho kualidade, kompañia entrega tiha ona ba Governu, maibé sira mak lahatene uza. Sira fó ha’u kaer obra ne’e ho fulan-neen, maibé obra hotu ona iha fulan-tolu de’it”, katak nia.

Hafoin entrega projetu ne’e ba Governu, kompañia kontinua halo manutensaun durante fulan-neen ho ahi ne’ebé lakan hotu no ambiente mós iha momentu ne’ebá.

Maibé kondisaun atuál fatin refere oras ne’e halo Diretora Empreza ne’e triste tanba duut mak nakonu no laiha atensaun hosi Governu.

Nia dehan, maske fatin ne’e ho kondisaun ladún di’ak maibé tempu loron boot no sábadu-domingu ema sempre nakonu.

“Ha’u sente laran-moras tanba ita servisu kolen no gasta osan boot, maibé Governu la tau seguransa”, dehan nia.

Purtantu Xefe Suku Maumeta, Victor da Silva, informa fatin ne’e la’ós responsabilidade xefe suku nian tanba ne’e autoridade munisipál mak bele foti desizaun kuandu kompañia entrega ona, Governu mak tenke haree oinsá kuidadu fatin labele hetan estragu.

“Depois de entrega laiha ema haree, portaun laiha, entaun ai-oan sira ne’ebé kuda iha ne’ebá animál tama han hotu no laiha manutensaun. Ami labele tama iha laran kuandu la entrega mai ami, entrega de’it ba munisípiu, maibé la entrega ba see mak atu halo manutensaun. Problema ne’e iha ne’e”, informa Xefe Suku Maumeta.

Kompañia MIFA konstrui uma ualu iha fatin refere no halo mós reabilitasaun ba uma sira ne’ebé antes ne’e harii ona. Nune’e uma ki’ik hamutuk 15 ho hariis-fatin rua.

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here