Primeiru-Ministru, Taur Matan Ruak. Imajen/Tatoli.

DILI, 12 novembru 2019 (TATOLI) – Ohin loron Timor-Leste selebra Loron Nasionál Juventude ba dala-14, ne’ebé marka mós loron Masakre Santa Cruz iha 12 Novembru 1991.

Iha loron ne’ebá, joven lubun ho aten barani halo manifestasaun pasífika hahú husi Igreja Motaél to’o tama Rate Santa Cruz, hafoin Militár Indonézia hahú tiru hasoru manifestante sira.

Ba selebrasaun tinan 28, Masakre Santa Cruz, Primeiru-Ministru (PM), Taur Matan Ruak, hato’o mensajen ba joven sira hodi nafatin firme no labele deziste bainhira hasoru difikuldade ruma.

“Ha’u hakarak apela ba joven hotu ne’ebé namkari iha rai laran, atu fó imi-nia neon no laran tomak ba estudu. Bainhira hetan difikuldade ruma, labele deziste tanba atu ku’u presiza kuda, nune’e mós atu sai matenek presiza estuda maka’as. Futuru Timor-Leste nian iha imi joven sira nia liman! Buka hakbesik-aan ba malu hodi tuur hamutuk halo reflesaun ida kona-ba hanoin ida tuirmai ne’e”, tenik PM Taur liuhosi nota ne’ebé Agência Tatoli asesu, tersa ne’e.

Xefe Governu husu ba jerasaun foun sira hodi hametin-aan ho valór ne’ebé joven sira mate iha Masakre Santa Cruz husik ona hodi defende lia loos.

“Imi sei bele haree futuru ida ho esperansa”, nia afirma.

Tuir Xefe Governu, ohin loron hanesan loron importante tebes tanba iha tinan 28 liubá,  juventude ho determinasaun no espíritu luta nian, hamriik hodi hakilar ba mundu katak Timor-Leste hakarak ukun rasik-aan.

“Iha okaziaun ne’e, ha’u konvida joven atu deskobre hamutuk ho kle’an liután, ezemplu eroízmu kona-ba moris, domin, sakrifísiu, responsabilidade no dame, ne’ebé sira husik hela mai ita. Sira mate atu ita hetan ukun rasik-aan. Sira mate atu ita moris iha dame nia laran no hodi ita harii nasaun ida-ne’e,” nia salienta.

Xefe Governu dehan tan, Timor-Leste maski nu’udar nasaun ida foin hamriik ho otas sei ki’ik maibé nia parte orgullu tanba foin maka hetan independénsia iha tinan 17 liubá maibé diferente hanesan nasaun hirak ne’ebé ukun-aan kle’ur ona

“Saida mak ha’u bele halo no fó ba ha’u-nia nasaun! Ita-nia nasaun foin hamriik tinan 17. Haree hosi esperiénsia nasaun sira ne’ebé ukun-aan liu ita tinan barak ona, hanesan timoroan, ha’u orgullu katak ita la’ós nasaun ida ne’ebé di’ak liu iha mundu maibé mós la’ós aat liu iha mundu,” nia dehan.

Nune’e, nia apela mós ba timoroan hotu, liliu ba joven sira atu kontribui ba pás no estabilidade sosiál iha nasaun ne’e, nune’e rai-lulik ne’ebé ema hotu hadomi bele sai hanesan nasaun ida-ne’ebé hotu-hotu hakarak, modernu no prósperu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here