Prezidente Repúblika, Francisco Guterres Lú Olo. Imajen /TATOLI

DILI, 12 novembru 2019 (TATOLI)–Prezidente Repúblika (PR), Francisco Guterres ‘Lú Olo’, hato’o ninia sentida omenajen ba Juventude Aswa’in sira ne’ebé lakon vida iha fatin istóriku Santa Cruz no mós ba jornalista estranjeiru sira ne’ebé ho aten barani halo filmajen ba akontesimentu masakre.

Sentida omenajen ne’e Xefe Estadu hato’o iha ninia diskursu selebrasaun Loron Nasionál Juventude ba dala-14 no tinan 28 Masakre Santa Cruz 12 Novembru 1991.

“Dala ida tan ita halibur malu iha loron no fatin istóriku ida-ne’e hodi hanoin hikas Juventude Loriku Aswa’in, joven liu 200 ne’ebé iha loron 12  Novembru 1991 lakon sira nia vida. Ita hanoin hikas sira hotu ho sentimentu kle’an nu’udar referénsia ba korajen no dedikasaun ba ita-nia liberdade no independénsia. Ha’u-nia sentida omenajen ba sira hotu!”, tenik PR, tersa ne’e.

Iha Santa Cruz, Xefe Estadu hato’o ninia respeitu no hakuak boot ba família sira hotu ne’ebé to’o ohin loron sei sente lakon no rekoñese joven sira ne’ebé hola parte iha istória luta libertasaun.

“Ita rai nia istória, juventude sempre iha kna’ar ida ne’ebé importante no desizivu tebes”, nia akresenta.

PR salienta, jerasaun foinsa’e sira husi tinan 1974 no 1975, ka xefe Estadu ninia jerasaun foinsa’e rasik iha tempu ne’ebá simu kna’ar ida  todan tebes hodi halo funu atu Timór bele hetan liberdade no ukun rasik-aan.

Nia konta tuir, durante tinan 24 nia laran sira ne’ebé partisipa iha luta libertasaun nasionál hatene difikuldade no obstákulu saida maka hasoru daudaun.

“Ita konsege hakat difikuldade sira ne’e hotu tanba ita-nia espíritu nasionalista, ita-nia determinasaun, ita-nia barani, ita-nia domin ba nasaun no ba povu ida-ne’e boot tebetebes.

Espíritu nasionalista ida-ne’e duni no domin ba ita-nia rai no povu maka lori foinsa’e sira la ta’uk see-aan ba mate iha loron sakrifísiu 12 Novembru 1991, iha lurón Dili nian no iha rate Santa Cruz”, nia subliña.

Tuir Xefe Estadu, masakre ne’ebé akontese iha fatin istóriku Santa Cruz durante serimónia relijioza ida-ne’ebé reza ho lian portugés halo luta avansa liután ba oin no halo komunidade internasionál fó atensaun liután ba iuta libertasaun nasionál.

Liu tan ida-ne’e, PR konta iha tempu ne’ebá, iha rai-laran, Frente Armada no Frente Klandestina konsolida sira-nia solidariedade ba malu iha liña kombate no Frente Klandestina mak sai alvu prinsipál ba forsa invazór sira.

Aleinde ne’e, nia hatutan, iha rai-li’ur, Frente Diplomátika, Frente Armada no Frente Klandestina nia portavóz maka sai fatór prinsipál ba kombate polítiku diplomátiku hodi buka dalan ba solusaun konflitu iha Timor-Leste atu hatuur hikas legalidade jurídika internasionál ba direitu povu Timor-Leste ba auto-determinasaun no independénsia nasionál.

“Ita labele haluha mós katak rekoñesimentu internasionál ida-ne’e la akontese karik ita laiha belun barani balun hosi nasaun seluk, Governu no organizasaun internasionál sira, hamutuk ho ita. Ha’u refere mós ba jornalista sira ne’ebé iha loron ne’ebá barani filma Masakre 12 Novembru no ikus halo filme ida kona-ba ita nia istória luta libertasaun hodi lori ba rai barak no fó mensajen ba foinsa’e sira katak povu Timor-Leste hamriik organizadu no determinadu atu ukun rasik-aan”, PR dehan tan.

“Max Stahl, Saskia Kouwemberg, Russel Anderson, Amy Goodman no Allan Nairn. Ha’u-nia omenajen espesiál ba Kamal Bamadhaj, foinsa’e estudante ida hosi Nova Zelándia ne’ebé la ta’uk tuir marsa ho ita-nia foinsa’e sira no hetan tiru to’o mate”, nia konklui.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here