Diretór Centro Nacional Chega, Hugo Fernandes, hamutuk ho nia delegasaun lori timorooan sira ne'ebé antes ne'e lakon tanba funu aprezenta ba Prezidente Repúblika, Francisco Guterres Lú Olo. Imajen Tatoli/Egas Cristóvão

DILI, 11 novembru 2019 (TATOLI)–Organizasaun sosiedade sivíl hosi Timor-Leste no Indonézia servisu hamutuk ho Governu rua (Timor-Leste no Indonézia), konsege lori hikas timoroan na’in 14 ne’ebé lakon durante okupasaun Indonézia, liuhusi Programa Reuniaun Labarik Lakon ho Família. 

Iha loron 11 fulan ne’e, organizasaun sosiedade sivíl lori sidadaun hirak ne’e ba hasoru malu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Dili.

Hafoin reuniaun, Diretór Ezekutivu Centro Nacional CHEGA!, Hugo Maria Fernandes, hateten iha soru-mutuk ho labarik lakon, Prezidente Repúblika, Francisco Guterres Lú Olo, enkoraja no apoiu inisiativa organizasaun sosiedade sivíl atu buka labarik lakon.

Nia relata katak Xefe Estadu apresia inisiativa husi organizasaun sosiedade sívil husi Timor-Leste no Indonézia hodi kontinua buka labarik sira lakon forsada durante okupasaun estranjeira no reunifikasaun fali ho ninian família, ho esperiénsia serbisu hamutuk entre nasaun rua bele loke liután dalan ba oin hodi hametin relasaun.

Hugo konta tuir katak hahú kedas iha tinan 2014, organizasaun sosiedade sivíl hosi Timor-Leste no Indonézia serbisu hamutuk hetan mós apoiu husi instituisaun Governu rua, hodi realiza programa buka ema lakon no halo reunifikasaun.

“Maluk na’in 14 ne’ebé ita lori mai hasoru malu ho Xefe Estadu tama iha kategoria labarik lakon ne’ebé militár Indonézia sira lori forsadamente durante tempu okupasaun. Maioria ho idade tinan sanulu mai kraik. Sira ne’e kuaze tinan barak nia laran, maioria tinan haat-nulu-resin, lakon kontaktu ho família iha Timor. Ohin, balun foin hasoru malu ho família”, Hugo haktuir.

Nia hatutan, tinan ne’e halo reunifikasaun ba timoroan sira ne’ebé lakon hamutuk na’in 66, revista no hetan ona kuaze atus ida resin, maibé atu lori sira mai hasoru difikuldade barak tanba Indonézia rai luan, nasaun boot, no distánsia dook. Tanba ne’e, tinan-tinan ekipa traballu koko lori entre na’in sanulu to’o na’in sanulu-resin-sia.

Iha fatin hanesan, Diretór Ezekutivu Organizasaun Asian Justice and Rigts (AJAR) Timor-Leste, José Luís de Oliveira haklaken maluk sira ne’e hanesan vítima tanba sira sei ki’ikoan ema viola sira-nia direitu ba hatene sira-nia inan-aman.

“Tanba ne’e maka ami serbisu atu restaura fali sira-nia direitu, maski agora balun ferik no katuas ona, maibé sira-nia direitu ne’ebé ema viola nu’udar labarik atu hatene loloos sira-nia família, ami serbisu atu restaura hikas liuhusi programa reunifikasaun. Atu sai sidadaun ka la sai sidadaun Timor ne’e depende ba sira tanba iha eeperiénsia hatudu katak hafoin ita halo reuni no sira hasoru malu ho família, balun ikus mai deside fila hikas mai sai sidadaun Timor no balun filafali ba Indonézia tanba sira iha ona oan, no beioan iha ne’ebá, importante mak ita konsege lori hikas sira fila mai Timor ne’ebé tinan-tinan sira sempre mai vizita família”, nia hateten.

Nia haklaken, iha esperiénsia hatudu katak buat ne’ebé difísil liu maka buka sira hanesan loos buka daun iha hare kain nia okos tanba Indonézia ne’e rai luan tebes no sira hela separadu iha fatin oioin, hanesan Java, Kalimantan, Sulawesi no sikun sira Indonézia nian.

Luís hatutan, sira ne’e maioria militár Indonézia mak lori, no ema hirak ne’e mak to’o agora laiha vontade polítika atu hatudu ka lakohi koopera atu fó informasaun.

Iha fatin hanesan, labarik lakon ho naran Manuel Oliveira Soares ne’ebé oras ne’e troka ona naran ba Ahmad Manuel husi Aileu agradese ba organizasaun sosiedade sivíl ne’ebé ho esforsu maka’as hodi konsege lori hikas nia mai to’o Timor atu hasoru malu ho família ne’ebé nunka hetan kontaktu durante tinan 43 nia laran.

Manuel oras ne’e hela iha Jakarta, Indonézia, hafoin iha tinan 1977 militár sira lori nia sai husi Timor ho idade 16 to’o ohin loron.

Tuir relatóriu Chega katak purvolta labarik hamutuk 4000 lakon obrigatóriu tanba funu iha tinan 1975 mai to’o 1999. Nune’e, iha tinan 2005, Timor-Leste Indonézia harii Komisaun Verdade Amizade ho mandatu ida atu buka labarik sira ne’ebé lakon forsadu, bazeia ba rekomendasaun ne’e mak organizasaun sira konsege identifika ona labarik hamutuk 120 lakon, no reunifika ona labarik 77 lakon ho sira-nia família.

Iha tinan-2013, organizasaun sosiedade sivíl husi nasaun rua estabelese Grupu Traballu Umanitária ba Labarik Lakon ho ninian membru AJAR, ACBIT, CVTL, Asosiasaun HAK, CNC, KOMNAS HAM, ICRC, IKOHI, KONTRAS, Asosiasaun Vítima, PDHJ no Prezidénsia Repúblika, ne’ebé hetan ona apoiu husi Governu Timor-Leste liuhusi Ministériu Solidariedade Sosiál no Inkluzaun (MSSI).

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here