12 de Novembru

DILI, 11 novembru 2019 (TATOLI) – Timor-Leste komemora Masakre 12 Novembru hodi hanoin hikas sofrimentu joven lubuk ida iha tinan 28 liubá (1991), bainhira hetan atake husi Militár Indonézia hafoin halo manifestasaun husi Igreja Motaél to’o rate Santa Cruz.

Vise-Xefe Bankada FRETILIN, Francisco Miranda Branco, konsidera loron istóriku ida-ne’e importante tebes ba povu tomak.

“Masakre ida-ne’e kontribui no hakotu okupasaun Indonézia nian iha Timór. Joven sira hatudu istória hosi ne’ebá no hatudu katak iha faze istória hotu joven importante ba determinasaun”, dehan Branco iha resintu Parlamentu Nasionál (PN), segunda ne’e.

Tuir nia, iha prosesu luta naruk hatudu katak joven sira ho aten brani luta kontra okupasaun.

“Ita hotu tenke rekoñese loron ida-ne’e hanesan loron importante. Agora kontinuasaun ba prosesu konstrusaun Estadu nian, ne’ebé joven determinante nafatin no sira kontinua esforsu hodi hetan kualidade di’ak iha setór edukasaun”, nia akresenta.

Atu foin sa’e sira bele hetan asesu esukasaun ho kualidade, Deputadu Bankada Opozisaun ne’e husu Estadu no Governu tenke fó fasilidade hodi bele hetan sistema edukasaun ida ne’ebé di’ak liu ho kualidade aas, nune’e Timor-Leste bele iha rekursu umanu ida ne’ebé kualidade iha futuru.

Nune’e, reprezentante povu ne’e husu Governu hodi kria polítika orsamentál ida di’ak nune’e joven sira ne’ebé asesu ba edukasaun ho di’ak.

Parte seluk, Deputadu Bankada CNRT, Domingos de Carvalho, konsidera Masakre 12 Novembru hanesan loron istóriku ne’ebé joven sira kontribui iha luta naruk.

“Ita hotu hatene katak mundu internasionál hatene masakre ida-ne’e maka loke dalan ba ita hodi hetan independénsia. Nu’udar reprezentante povu valoriza tebes loron ida ne’e ba Aswain sira”, subliña Deputadu Bankada Governu ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here