Diálogu entre Governu Timor-Leste no Indonézia ho timoroan na'in 14 ne'ebé organizasaun sosiedade sivíl husi nasaun rua lori fila mai Timor, hafoin haketak malu ho família durante tinan barak nia laran, kauza husi funu. Imajen TATOLI/Cipriano Colo

DILI, 11 novembru 2019 (TATOLI)–Ministru Justisa (MJ), Manuel Cárceres, lori Governu nia naran agradese ba organizasaun sosiedade sivíl husi Timor-Leste (TL) no Repúblika Indonézia (RI) ne’ebé durante ne’e serbisu maka’as hodi lori hikas timoroan sira ne’ebé lakon durante tempu okupasaun.

Sentidu agradesimentu ne’e, Ministru Justisa hato’o iha diálogu entre Governu ho labarik lakon na’in 14, iha salaun Centro Nacional CHEGA!, eis komarka Balide, Dili, segunda ne’e.

“Lori Governu Timor-Leste nia naran, hakarak agradese no fó rekoñesimentu boot ba maluk organizasaun sosiedade sivíl husi nasaun rua, liuliu maluk sira ne’ebé fó sira-nia tempu no fó aan tomak liuhusi esforsu lubuk ida hodi hetan maluk timoroan sira ne’ebé sai vítima ba diferensa polítika iha pasadu”, Cárceres tenik.

Manuel Cárceres mós pessoalmente agradese ba sakrifísiu boot husi organizasaun sosiedade sivíl sira, tanba kna’ar ne’ebé timoroan sira halo iha pasadu seidauk ramata, no ohin loron ho organizasaun sosiedade sivíl sira-nia tulun bele iha tan rezultadu balun, liuhusi halo reuni timoroan sira ne’ebé lakon.

Nia hatutan, iha tinan 17 liubá, Manuel Cárceres hanesan responsável másimu ba ekipa United Nations (UN) hodi buka tuir labarik timoroan sira ne’ebé haketak aan husi família dezde okupasaun Indonézia.

Nia sita katak iha relatóriu balun hatudu katak iha labarik timoroan hamutuk 4.700 resin mak ho forsadamente haketak aan husi família kauza husi funu.

Tanba ne’e, durante tinan ualu, Cárceres serbisu iha organizasaun internasionál ba asuntu refujiadu (UNHCR-sigla Inglés), konsege reunifika labarik timoroan 2.200 resin ne’ebé lakon.

Antes ne’e, Cárceres mós ba to’o iha Sulawesi atu loke dalan hodi lori fila refujiadu timoroan sira ne’ebé iha funu refujia ba Sulawesi.

Nia temi katak timoroan barak mak hela iha Java Osidentál, Sulawesi, Java Sentrál, Semarang no Jogyakarta.

Iha tinan 2009, Cárceres husik hela UNHCR, no antes ne’e sai mós sasin ba asinatura akordu iha Bali-Indonézia, hodi entrega ba Governu rua lista labarik hamutuk 2.000 resin ne’ebé seidauk hetan sira-nia paradeiru.

Nia haktuir ekipa traballu atuál relata katak iha ona labarik 60 resin mak fila mai Timor hodi hasoru malu ona ho família, no husi númeru ne’e sei falta 1.900 mak seidauk lori fila.

“Númeru 1.900 resin ne’e, ha’u fiar katak iha loron ruma sira sei mai rasik hodi hasoru malu ho família sira iha Timor-Leste”, nia informa.

Nia ko’alia ba ema na’in 14 ne’e katak buat ne’ebé halo timoroan orgullu maka maski fahe malu durante tinan haat-nulu resin, maibé bainhira fila hikas mai to’o Timor sei bele ko’alia lian Tetun.

“Hanesan Ministru Justisa Timor-Leste, ha’u hateten katak, tuir Konstituisuan RDTL artigu 3, imi-na’in hirak ne’e hanesan sidadaun Timor ‘de facto’ tanba imi-sira ne’e moris iha Timor no inan-aman ema timoroan, maski ‘de júri’ iha ninia prosedimentu rasik. Imi-nia oan sira mós hanesan sidadaun Timor-Leste. Iha tempu ruma bainhira imi hakarak filafali mai Timor-Leste no hakarak atu sai sidadaun Timor, sei laiha impedimentu. Ha’u fiar katak ita-boot sira sei hili dalan ne’ebé diakliu ba imi no imi-nia oan sira-nia futuru”, Cárceres esplika.

Tuir dadus husi ekipa traballu reuni entre “Labarik Lakon” ho família iha TL hatudu katak ekipa traballu realiza ona reuni entre labarik sira ne’ebé lakon iha tempu okupasaun Indonézia ho sira-nia família ba dala -6 ho totál “labarik”na’in-80. Iha maiu 2015, ekipa traballu fasilita reuni “labarik” na’in-15, iha novembru 2015 fasilita reuni “labarik” na’in-15, no iha maiu 2016 reuni na’in-12, iha novembru 2017 reuni na’in-15, iha dezembru 2018 reuni “labarik lakon” na’in-9 no tinan ne’e reuni tan na’in-14.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here