DILI, 11 novembru 2019 (TATOLI) – Ohin, Prezidente Repúblika (PR), Francisco Guterres Lú Olo konvida Embaixadór Brazíl iha Timor-Leste, Aldemo Serafin Garcia Junior, hodi esplika situasaun polítika atuál iha rai-laran.
Enkontru entre Xefe Estadu ho Embaixadór Brazíl hala’o iha Palásiu Prezidensiál Nicolau Lobato, Dili.
Hafoin enkontru, Embaixadór Aldemo Serafin Garcia Junior deklara ba mídia katak nia hetan konvite husi Xefe Estadu Lú Olo, hanesan mós ho embaixadór rezidente sira husi nasaun seluk iha Timor-Leste.
“Prezidente Repúblika konvida ha’u mai iha-ne’e hodi ko’alia uitoan kona-ba situasaun polítika Timor-Leste nian. Ha’u kontente tanba inisiativa ida-ne’e importante tebes”, nia hateten.
Aldemo mós agredese no fó parabéns ba inisiativa eselente husi Xefe Estadu, tanba durante enkontru bele troka ideia kona-ba situasaun atuál nasaun nian, liuliu impase polítika no diskute oinsá hetan solusaun ruma.
Nia informa, iha diskusaun ne’e, hanesan reprezentante nasaun Brazíl, sujere ba Xefe Estadu Lú Olo katak dalan di’akliu atu hakotu impase polítika ne’ebé Timor-Leste enfrenta maka liuhusi diálogu maibé la’ós Eleisaun Antesipada (EA).
”Ba ha’u, eleisaun antesipada la’ós solusaun ida di’ak liu, tanba foin akontese iha tinan kotuk iha ne’ebé han kustu-boot no tenke mobiliza forsa barak husi nasaun nian”, nia subliña.
Durante enkontru ne’e mós, Embaixadór Brazíl ho Prezidente Repúblika ko’alia mós kona-ba dezenvolvimentu indústria petróliu no kriasaun indústria petrolífera iha parte tasi mane.
Jornalista: Cipriano Colo
Editór: Xisto Freitas
