Sesaun plenária Parlamentu Nasionál. Imajen /TATOLI

DILI, 11 novembru 2019 (TATOLI) – Proposta Orsamentu Jerál Estadu (OJE) 2020 ho montante biliaun $1,950 sai hanesan orsamentu ne’ebé boot liu iha tinan lima ikus, tanba ne’e sai preokupasaun la’ós de’it ba Deputadu Bankada Opozisaun sira maibé mós inklui Bankada Governu.

Deputadu Bankada CNRT, Domingos de Carvalho, hateten montante orsamentu 2020 tenke hanesan ho 2019 nian, ne’ebé hafoin reapresiasaun no halo redusaun millaun $650, montante ikus ne’ebé hetan promulgasaun husi Prezidente Repúblika, Francisco Guterres ‘Lú Olo’ maka, biliaun $1,482.

“Karik maka governu mantein ho biliaun $1,950, ne’e ami rasik la hatan a-favór, nune’e mós halo redusaun tenke hetan konsensu. Bainhira Governu mantein ami sei vota kontra hanesan ami-nia kolega deklara ona ne’e ba publiku katak CNRT sei vota kontra”, tenik  Deputadu Bankada Governu ne’e jornalista sira iha resintu Parlamentu Nasionál, segunda ne’e.

Nia subliña, Proposta OJE 2020 tenke iha padraun ida katak to’o biliaun $1,3 ka biliaun $1,4, nune’e labele liu Rendimentu Sustentável Estimadu (RSE).

“Ami kaer prinsípiu katak labele liu montante ne’e. Ida-ne’e Másimu ona no bainhira liu pasiénsia tenke vota kontra”, nia afirma pozisaun.

Domingos de Carvalho argumenta, desizaun atu vota vontra la’ós hetan orientasaun polítika hosi dirijente partidu CNRT maibé tanba haree ba montante orsamentu ne’ebé boot liu.

Enkuantu, Deputadu Bankada PLP, Sabino Soares ‘Guntur’, konsidera desizaun bankada sira atu vota kontra Proposta OJE 2020 ne’e pozisaun ida-idak ninian.

“Bainhira ita ezije de’it atu hatún ne’e problema boot. Sira atu vota kontra orsamentu jerál hanesan opsaun polítiku bankada idak-idak nian, maibé tanba AMP ne’e bloku sósiu bele mosu presepsaun sobu AMP”, dehan Deputadu Bankada Governu ne’e.

Nune’e, nia fó hanoin molok debate orsamentu 2020, bloku AMP iha Parlamentu tenke ko’alia ba malu atu labele iha desentendimentu.

Tuir livru orsamentál, alokasaun orsamentu ba kategoria saláriu no vensimentu millaun $241,3 sa’e pursentu 12,6 iha 2020 kompara ho alokasaun ba kategoria orsamentu ida nee iha OJE 2019.

“Ida ne’e tanba kustu hosi mudansa iha estrutura tuir orgánika foun, rejime espesiál ba funsionáriu públiku no rekruitamentu foun”, refere livru Panorama Orsamentál.

Medida Prinsipál hosi kategoria saláriu no vensimentu millaun $6,5 ba munisípiu hotu hodi kompleta pozisaun iha estrutura governu lokál, millaun $2,0 ba Ministériu Finansa hodi selu nia funsionáriu sira ne’ebé hetan rejime espesiál, millaun $1,6 ba Ministériu Negósiu Estranjeiru no Kooperasaun hodi rekruta joven diplomata foun, $936.000 ba F‐FDTL hodi halo rekrutamentu ba 600 membru foun, $730.000 ba Komisaun Funsaun Públika ba promosaun interna ba funsionáriu sira, aumentu ida ne’e atu responde ba mudansa iha estrutura ne’ebé define ona iha orgánika foun ministériu no instituisaun estadu sira liuhusi OJE 2020.

Alokasaun orsamentu Fundu Konsolidadu Timor-Leste (FKTL) ba kategória bens no servisu millaun $703,7 ba tinan 2020, sa’e pursentu 55,4 kompara ho alokasaun orsamentu ba kategória ida ne’e iha OJE 2019.

“Aumentu iha 2020 ne’e tanba atu hadi’a povu nia moris, alokasaun boot ba manutensaun no operasaun eletrisidade, no mós ba transporte públiku”, subliña nota ne’e.

Medida Prinsipál ba kategoria bens no servisu, hamutuk millaun $173,9 iha Ministériu Obra Públika ba mina no manutensaun jeradór eletrisidade iha Hera no Betano inklui manutensaun ba transmisaun eletrisidade 150KW no sub‐estasaun 20KW, millaun $92,0 iha “Dotasaun ba Governu Tomak” ba fundu kontrapartida.

“Ida-nee atu kontinua implementa projetu kontrapartida sira inklui sosa ró atu halo patrullamentu iha fronteira marítima no sosa ferry Nakroma II”, esplikasaun livru.

Nune’e mós millaun $15,0 iha “Dotasaun ba Governu Tomak” ba servisus legál, millaun $5,5 iha ”Doatasaun ba Governu Tomak” hodi selu dívida eletrisidade (EDTL), millaun $5,0 iha “Dotasaun ba Governu Tomak” ba servisu aviasaun sivíl, millaun $5,0 iha “Dotasaun ba Governu Tomak” hodi selu ba kuota nu’udar membru ba instituisaun internasionál sira hodi kontinua asegura partisipasaun Timor‐Leste nian iha atividade nível rejionál no internasionál, millaun $4,9 ba Servisu Autónomu Medikamentu no Ekipamentu Saúde (SAMES) atu sosa aimoruk no sasán farmasia nian hodi ajuda hadi’a kualidade servisu saúde públiku iha territóriu tomak.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here