Administradór Postu Administrativu Uatucarabau, Mateus Martins Pinto. Imajen/Domingos Piedade

VIQUEQUE, 11 novembru 2019 (TATOLI) – Disputa sivíl sira ne’ebé akontese entre komunidade sira iha Postu Administrativu Uatucarbau, Munisípiu Viqueque sempre rezolve liuhosi mediasaun tuir justisa tradisionál ne’ebé implementa dezde bei’ala sira nia tempu.

Notísia Relevante : Lia Na’in husu MRLAP Elabora Lei Fó Kbiit ba Sira Rezolve Disputa iha Suku

Mezmu nune’e, ba kazu sira ne’ebé nia natureza krime públiku sempre emenda ba Ministériu Públiku liuhosi intervensaun autoridade polisia. Tanba ne’e, Administradór Postu Administrativu Uatucarabau, Mateus Martins Pinto, espera ba Governu liuhosi Ministériu Reforma Lejizlativa no asuntu Parlamentár (MRLAP) atu bele legaliza justisa tradisionál hodi justa ho justisa formal atu fó kbiit liután ba autoridade lokál sira bele rezolve disputa sira ho kategoria kazu sivíl iha suku laran no aldeia laran.

Hirak ne’ebé durante ne’e hala’o knar mediasaun b kazu sivíl sira iha suku laran, Mateus Martins Pinto, informa, xefe suku, xefe aldeia ho lia nain ka konsellu suku sira.

Liuhosi konsulta públiku kona-ba Lei Kostumeiru ho Justisa Tradisionál ho MRLAP iha Postu Uatucarbau, foin lalais ne’e, Administradór Postu Administrativu Uatucarbau ne’e enkoraja konsellu suku atu kontinua solusiona ba problema ne’ebé mak akontese iha suku laran maske enfrenta dezafiu oi-oin iha baze.

Xefe Suku Irabin de Cima, Postu Administrativu Uatucarabau, Lino Martins, husu ba ukun nain no Parlamentu Nasional atu prodús lei hodi atribui kompeténsia ba autoridade lokál hodi rezolve disputa sira ne’ebé mak merese rezolve de’it iha suku laran. Atu nune’e, minimiza kazu sivíl sira pendente barak iha Tribunal.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here