Lideransa hosi Rejiaun ASEAN hasai fotografia hamutuk, hafoin partisipa konferénsia ministeriál internasionál kona-ba kontra finansiamentu terrorizmu ho tema "No Money for Terror”, iha Australia, foin lalais ne’e. Imajen/MI

DILI, 11 novembru 2019 (TATOLI):  Ministru Interna Austrália, Hon Peter Dutton, halo ‘alerta’ ida hodi  husu ba nasaun hotu-hotu atu servisu hamutuk luta kontra terrorizmu.

“Benvindu mai Austrália ba Ministru sira ho delegasaun no organizasaun internasionál tomak, priviléjiu tebes ha’u lori Governu Austrália nia naran hakarak hato’o obrigadu barak ba ita boot sira. Ho prezensa hosi nasaun barak no organizasaun internasionál barak iha ne’e, sai ona pasu ida ba oin, ita luta kontra terrorizmu,” afirma  Ministru Hon Peter Dutton, durante abertura konferénsia ministeriál internasionál kona-ba kontra finansiamentu terrorizmu ho tema “No Money for Terror,”.

Konferénsia internasionál ne’e hala’o durante loron rua iha Melbourne Convention Centre Austrália, hahú hosi loron 7 to’o loron 8 novembru 2019, lidera hosi Governu Austrália liuhosi Ministériu Interna hamutuk ho nasaun sira iha kontinente lima, inklui Timor-Leste.

Ministru Hon Peter Dutton, kongratula reprezentante nasaun hotu no husu atu komunidade internasionál servisu hamutuk luta hasoru terrorizmu. Tanba tuir nia, luta kontra hasoru terrorizmu presiza liña koordenasaun servisu komunidade internasionál sira nia apoiu.

“Nasaun bele forte oinsá mós, laiha nasaun ida mak bele luta mesak hasoru terrorizmu. Tanba ne’e, komunidade internasionál tenke hakuak no fó liman ba malu hodi hasoru terrorizmu ida ne’e. Ita haree ba daudaun, partikularmente sira uza teknolojia modernu hodi halo tranzasaun online hodi kria fundu no finansia terrorista, alende ne’e mós sira uza média sosiál hodi halo propaganda radikál hodi influensia foin sa’e sira nia hanoin. Entaun ida ne’e maka risku ne’ebé dezafia ita haree hamutuk,” hatete Peter Dutton.

Ministru Interiór Interinu, Filomeno da Paixão de Jesus, ne’ebé akompaña hosi Komandu forsa Espesiál F-FDTL Tenente Koronél Dobu, hamutuk ho adidu seguransa iha Canberra, Afonso de Jesus no Adidu Defeza iha Canberra Koronél José da Costa Soares (Trix) partisipa mós iha eventu internasionál ne’e.

Ministru Filomeno dehan,  semináriu ne’e importante tebes hodi Timor-Leste bele afirma mós nia pozisaun luta kontra terrorizmu.

“Semináriu ida ne’e importante tebes, atu bele hatene kle’an kona-ba oinsá terrorista sira halibur fundu hodi hala’o sira nia atividade. Ohin loron terrorista nia influensia la’ós de’it iha Médiu Oriente, maibé tama ona mai Europa, Indonézia rasik no sei to’o mai ita nia nasaun. Tanba ida ne’e mundu internasionál presiza servisu hamutuk kria estratéjia hodi halo prevensaun kontra terrorizmu,” hateten Ministru Filomeno  Paixão iha komunikadu ne’ebé Ajénsia TATOLI asesu.

“Ita hotu hatene katak, terrorista maka atividade violentu ida ne’ebé grupu radikalizmu sira uza atu hata’uk no kria instabilidade ba ema seluk hodi atinje sira nia objetivu polítika no ideolojia. Tanba ne’e, ita sei halo koordenasaun ho liña ministeriál, hamutuk ho sosiedade sivíl inklui Banku Central mós, presiza alerta ho sélula terrorista no ita sei la husik poténsia radikalizmu envolve ita nia joven sira. Ita sei la husik ida ne’e akontese,” afirma Ministru Filomeno Paixão.

Konferénsia ne’e hetan partisipasaun másimu husi reprezentante nasaun tomak inklui organizasaun internasionál hirak ne’ebé haree kona-ba fundu mundiál no ASEAN rasik. 

Jornalista : Eugénio Pereira  

Editór       : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here