Postu kombustivel.

DILI, 11 novembru 2019 (TATOLI) – Diretór Diresaun Downstream Autoridade Nasionál Petróleu no Minerál (ANPM), Nelson de Jesus, hateten hahú janeiru to’o outubru tinan ne’e, ANPM konsege rekolla taxa husi postu abastesimentu kombustivel sira hamutuk rihun $100-resin.

“Taxa ne’ebé ami rekolla iha postu abastesimentu kombustivel iha tinan ne’e (2019) hamutuk rihun $100-resin”, Diretór Nelson ba jornalista sira iha Tower Bar, Fatuhada, ohin.

Nia dehan, taxa ne’ebé ANPM rekolla ne’e husi postu abastesimentu kombustivel ne’ebé rejista no tuir ona padraun internasionál hamutuk 45.

“Postu abastesimentu kombustivel ne’ebé ami fó lisensa ona ne’e hamutuk 45 iha kapitál Dili no munisípiu sira”, katak.

Diretór Nelson friza ANPM regula no kontrola atividade harii postu abastesimentu kombustivel atu tuir rekizitu, hafoin halo operasaun.

Kritéria atu harii postu kombustivel, Nelson Soares, adianta prosesu dahuluk mak kompañia rejista no estatutu iha SERVE, sertifikadu rai no lisensa ambientál hafoin ANPM aprova projetu konstrusaun postu kombustivel ne’e.

Hafoin aprova, iha prosesu daruak, empreza tenke aprezenta dezeñu ba konstrusaun ne’e.

“Ita haree dezeñu atu hatudu de’it katak bomba kombustivel hira no tanke hira inklui tratamentu bee fo’er iha ne’ebé, no fasilidade hamate ahi karik inséndiu ruma akontese no pesoál ne’ebé enxe mina tenke tuir formasaun sokorru inklui tanke mina tenke hakoi hotu tuir ANPM nia kritéria mak foin aprova atu harii tuir padraun internasionál”, katak.

Nia dehan, ANPM kontinua halo monitorizasaun ba postu abastesimentu kombustivel sira atu harii ho garante seguransa no saúde ba sidadaun sira.

“Ita-nia maluk balun halo dezeñu, maibé ba konstrusaun ne’e lahanesan ne’ebé ami tenke haruka tanba postu kombustivel sira ne’e padraun internasionál ne’ebé komunidade hela besik laiha risku”, afirma.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here