Sentru Apoiu Saúde Mentál São João de Deus Laclubar, ne’ebé lokaliza iha Postu Administrativu Laclubar, Munisípiu Manatuto. Imajen/Espesiál

DILI, 08 novembru 2019 (TATOLI) – Ekipa hosi Sentru Apoiu Saúde Mentál São João de Deus Laclubar, hasoru malu ho Primeiru-Ministru (PM), Taur Matan Ruak, hodi aprezenta servisu ne’ebé durante ne’e dezenvolve ona ba ema ho saúde mentál no mós preokupasaun durante serbí moras sira.

Diretór Sentru Apoiu Saúde Mental São João de Deus Laklubar, Padre José Manuel, hateten sentru saúde ne’e iha de’it kama internamentu hamutuk 12 ne’ebé la sufisiente.

“Kada loron hetan pedidu internamentu no ami laiha kapasidade. Tanba ne’e, ha’u hato’o ba Primeiru-Ministru atu ajuda aumenta kama internamentu pelumenus 20 tan. Bele iha Laclubar ka iha sentru saúde iha munisípiu seluk”, Padre tenik iha Palásiu Governu, hafoin hasoru malu ho PM, sesta ne’e.

Nia haktuir, durante ne’e kolaboradór iha Sentru Saúde Laclubar maka Irmaun sira iha São João de Deus ho órden ospitalár tanba ne’e rekursu umanu iha maibé presiza maka kama.

“Ami laiha Irmaun atu ba munisípiu seluk atu akompaña internamentu, tanba ne’e ideál liu aumenta tan kapasidade kama iha Laclubar”, nia akresenta.

Jerente sentru saúde ne’e informa, iha tinan 2019 kuaze ramata, simu ona pasiente hamutuk 50, hanesan alvu ne’ebé konsege atinje ona.

“Aleinde pasiente 50 ne’ebé ami simu iha ami-nia sentru saúde, ami mós ba munisípiu seluk hodi fó konsulta. Ami fó konsulta barak ona iha munisípiu sira mo asiste ona pasiente oioin. Munisípiu ikus ne’ebé ami vizita maka Maliana no ami atende pasiente hamutuk 58”, nia dehan tan.

Tuir Amu ne’e, sentru saúde ne’e hakarak serbisu ba ema ho moras mentál tanba ne’e hakarak fó kondisaun no tratamentu di’ak.

“Tanba ne’e, ohin ami hato’o preokupasaun ba Primeiru-Ministru, no hakarak agradese ba Governu, liuliu Ministériu Solidariedade Sosiál no Inkluzaun (MSSI) no Ministériu Saúde (MS), ba apoiu ne’ebé sira fó ba ami nia sentru saúde”, nia informa tan.

Nia rekoñese sein apoiu hosi Governu no parseiru seluk, difísil atu presta kuidadu ba ema ho problema mentál.

Tanba ne’e, iha oportunidade ne’e mai agoradese Primeiru-Ministru ba apoiu ne’ebé ami simu ona. Espera ba oin MSSI no MS.

Padre ne’e konta tuir, apoiu ne’ebé simu hosi MSSI no MS maka ai-moruk, alimentasaun, gastu ba kombustível, manutensaun, gastu ba jornada kolaboradór.

Aleinde apoiu hosi Governu, iha mós apoiu hosi parseiru seluk husi Portugál.

“Iha ai-moruk barak maka mai hosi Portugál atu ajuda trata moras, tanba iha Timór infelizmente falta ai-moruk. Tanba ne’e, husi parte Portugál fó ai-moruk no donativu balun hanesan refeisaun, roupa, osan no seluk tan”, nia esplika.

Nune’e mós, nia dehan, sentru saúde ne’e mós halo serbisu akampañamentu.

“Moras mentál mós presiza trata iha parte espirituál. Tanba ne’e, parte pastorál saúde no animasaun importe tebes. Parte espirituál ba sira-ne’ebe sofre moras mentál importante”, nia salienta.

Nia hatutan: “Ami servisu iha área pastór saúde iha kestaun pastorál no akompañamentu espirituál”.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here