Lansamentu Livru Estratejia Finansiamentu Saúde 2019 -2023. Imajen: Felicidade Ximenes

DILI, 08 novembru 2019 (TATOLI)-Oitavu Governu Konstitusionál liuhusi Ministériu Saúde (MS) lansa livru estratejia finansiamentu saúde ba tinan-2019 to´o tinan-2023, iha Universidade da Paz (UNPAZ).

Vise-Ministru Dezenvolvimentu Estratéjiku Saúde, Bonifácio Maucoli dos Reis. Imajen: Felicidade Ximenes

“Bazeia ba programa Ministériu Saúde nian husi Governu daualu aliña ho Planu Estratejiku Nasionál setór saúde ba tinan-2011 too tinan-2030 ne’ebé aborda ona pilár importante hitu mak prioridade ba Ministeriu Saúde nian,” hateten Vise-Ministru Dezenvolvimentu Estratéjiku Saúde, Bonifácio Maucoli dos Reis, iha diskursu bainhira atu halo lansamentu ba livru estratéjiku finansiamentu saúde ne´e, salaun José Casmeiro UNPAZ, ohin.

Lansamentu livru ne´e, dahuluk haforsa Sistema Nasionál saúde nian, daruak hasa’e provizaun ba preparasaun kuidadu saúde nian hanesan saúde primaria, sekundária, no tersiaria, datoluk investimentu iha kapitál umanu hanesan desenvolvimentu ba jestaun ba rekursu umanu ba saúde. Dahaat investimentu iha infraestutura no ekipamentu saúde, dalimak asegura finansiamnetu saúde ne’ebé sustentavel, daneen monitorizasaun avaliasaun ba servisu prestasaun sira hotu, dahituk servisu koperasaun parséria ho entidade husi área saúde sira hotu.

Maibé, tuir Vise-Ministru ne´e katak atu asegura sustentabilidade pilár sira ne’e hotu iha forma ekilibrariu tenke iha finansiamentu no orsamentu ne’ebé adekuadu no sustentável ba funsionamentu makina MS nian tanba nune’e presiza polítika, estratejia no padraun no mekanizmu ba lala’ok finansiamentu ba saúde.

Komplesidade ba finansiamentu saúde la hanesan ho finansiamentu jerál, finansiamentu ne’ebé liga ho prestasaun kuidadu saúde ema nia moris, ema nia moras, kazu emerjénsia, disponibilidade ai-moruk, ekipamentu médiku sira hotu.

Tan nune’e finansiamentu sai preokupasaun permanente ba jestór saúde sira hotu ne’ebé envolve direitamente ka indireitamente iha konstrusaun sistema nasionál saúde no sai tópiku konstrante ba diskusaun no enkontru sira hotu no instansia jestór no administradór sira.

“Sistema Nasionál Saúde iha Timor-Leste alkansa ona progressu subtansiál balun iha tinan-salunu dezde ita restaura indepedénsia maibé iha kontestu vulnerabilidade makru-ekonomika sei nafatin dezafiu krítiku bainhira ita lidera Sistema Nasionál Saúde hodi fornese Sistema Nasionál Saúde ida ne’ebé kualidade no adekuadu kompriensivu no gratuitu ba komunidade,” dehan governante ne´e.

Vise Ministru Dezenvolvimentu Estratejiku Saúde ne´e akresenta, prezisa abordajen no abrajente no estratéjiku finansiammentu sustentável ba saúde, garante aumentu no akrezimu iha rekursu finanseiru ba saúde, fortalese mekanizmu hodi hamoris reseita no rekursu iha setór saúde.

“Ha’u iha kontente boot atu aprezenta estratejia finansiamentu saúde Timor-Leste nian ne’ebé sei lansa iha fatin ida ne’e (UNPAZ), iha estratejia ne’e iha ita-nia aspirasaun no deskreve abordajen hodi harii sistema ida ba finansiamentu saúde ne’ebé hodi sustentavel ba Timor-Leste”.

Nia hatutan, estratejia ba dezenpeñu no progresu ne’ebé ita halo no esplora reforma no rekreativa sustentavel no hodi lori ba oin ho ajenda ba finansiamentu saúde nian.

Estratejia ne’e fornese ita ho orientasaun kreativu hodi lori ba oin ho misaun ne’ebé harii sistema finansiamentu ida ne’ebé robustu, resiliente no sustentavel ba Timor- Leste nian.

Estratejia finansiamentu saúde nu’udar resultadu husi konsulta diskusaun no distribuisaun oioin no husi matenek na’in sira kona-ba MS no Governu Timor-Leste ne’ebé bele alkansa sistema sustentável ba finansiamentu saúde ba kobertura universál saúde iha Timor-Leste.

“Lori Ministeriu Saúde hato’o ha’u-nia gratidaun ba ita-boot sira -nia diskusaun no konsultasaun. Ha’u mós agradese ba Organizasaun Mundiál Saúde no parseiru Uniaun Europeia no kobertura universál saúde hodi suporta Ministeriu Saúde hodi dezenvolve dokumentu inportante ida ne’e”.

“Agora ita hala’o lansamentu ba estratejia finanseiru, ha’u sente kontente tebes no nota katak iha lansamentu ba dokumentu importante ne’e, dahuluk relatóriu kona-ba diagnóstiku finanseiru ne’ebé fornese baze ba dezenvolvimentu estratejia finansiamentu ba saúde no konta nasionál nu’udar ferramenta estremamente util hodi haforsa rekursu finanseiru saúde”.

Dokumentu hirak ne’e, tuir Vise-Ministru Dezenvolvimentu Estratéjiku Saúde, Bonifácio Maucoli dos Reis, orienta no mobiliza esforsu hothotu husi governu no parseiru dezenvolvimentu, instituisaun akadémika, setór privadu, parte interesadu no komunidade hodi kontribui ba sistema finansiamnetu saúde sustentavel iha Timor-Leste

Entretantu, lansamentu livru estratejia finansiamentu saúde husi Vise-Ministru Dezenvolvimentu Estratejiku Saúde partisipa husi Organizasaun Mundiál Saúde (OMS), parseiru desenvolvimentu Uniaun Europeia, Diretór Farmasia husi MS, Magnífiku Reitór UNPAZ no estudante sira husi Fakuldade Ekonomia no Saúde Públika husi UNPAZ, Iinstitutu Siénsia Saúde, Institute of Business (IOB)  inklui profisionál saúde sira hotu.

Jornalista : Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here