Mapa eskola iha RAEOA. Imajen hosi portál zeesm.tl.

DILI, 07 novembru 2019 (TATOLI)–Prezidente Autoridade foun Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), José Luís Guterres (Lugu) deklara katak nia bá Oé-Cusse atu serbí povu Oé-Cusse.
Lugu deklara asuntu ne’e, hafoin sai oradór ba primeira konferénsia nasionál husi Komité Orientadór 25 iha Centro Convenções de Dili, ohin.

“Hau aseita atu bá Oé-Cusse la’ós tanba ha’u matenek liu. Ha’u mós la’ós iha esperiénsia barak liu, maibé tanba ha’u fiar katak ita iha ema kompetente husi rai Oé-Cusse, ita iha kompeténsia tradisionál ne’ebé mai kle’ur ona, povu Oé-Cusse ukun-aan kle’ur ona. Konsidera buat sira ne’e hotu mak ha’u hataan ba Primeiru-Ministru katak ha’u prontu atu serbí povu Oé-Cusse. Ha’u bá atu serbí povu Oé-Cusse tanba povu Oé-Cusse iha tradisaun ida-ne’ebé boot”, nia hateten.

Kona-ba programa prioridade, Lugu hateten, sei diskute ho ekipa traballu hafoin serimónia tomada pose. Nia mós lakohi atu personaliza dezenvolvimentu iha rai Oé-Cusse ba ema ida.

Lugu mós lakohi atu promete kona-ba buat saida mak nia sei halo, maibé nia husu atu akompaña nafatin ho krítiku tanba nia hakarak liu mak serbisu konkretu.

“Depois mak ita haree povu Oé-Cusse nia moris halo nusá. Buat ne’ebé ami sei halo maka ami sei kontinua kontaktu transparente ho mídia”, nia promete.

Relasiona ho preferénsia ba ekipa ne’ebé mak atu serbisu hamutuk, Lugu hatán, Oé-Cusse oan barak liu mak iha kapasidade, tanba saida mak tenke lori alin sira husi fatin seluk.

Nia rekoñese katak antes ne’e hetan ona kontaktu ho Ministru Negósiu Estranjeiru no Kooperasaun Dionísio Soares Babo ne’ebé husu disponibilidade atu sai hanesan embaixadór Timor-Leste nian ba Zenebra, no Lugu kontente ho ida-ne’e, tanba uluk tempu luta nia iha ne’ebá no konsidera katak ida-ne’e la’ós fatin ne’ebé difísil atu hala’o serbisu.

Tanba ne’e, molok Konsellu Ministru deside, Primeiru-Ministru mós konsulta uluk kona-ba nomeasaun ne’e, no nia prefere atu ba Zenebra maibé ikus mai Lugu dehan bainhira Governu fó fiar bá Oé-Cusse, nia prontu atu kobtribui.

“Tanba iha ha’u-nia vida ne’e ha’u iha prinsípiu filozófiku ida-ne’ebé ha’u tuir katak ita labele hili de’it buat fásil, no Oé-Cusse ita bá jere, tenke haree povu Oé-Cusse nia moris di’ak”, nia haklaken.

Antes ne’e mós Primeiru-Ministru, Taur Matan Ruak hateten Governu sei inválida naran José Luís Guterres no sei halo fali nomeasaun foun atu asume kargu nu’udar diplomata hodi reprezenta Estadu Timor-Leste iha Zenebra.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here