Hosi karuk ba loos, Komandante Lere Anan Timur, Mari Alkatiri, Francisco Guterres Lú Olo, Taur Matan Ruak, ho Kay Rala Xanana Gusmão, partisipa serimónia kulturál iha Masakre Craras, Viqueque. Imajen/Eugénio Pereira

DILI, 08 novembru 2019 (TATOLI)-Komandante FALINTIL atuál Xefe Estadu Maiór Jenerál F-FDTL,  Majór Jenerál Lere Anan Timur,  ohin, iha  abertura reuniaun Organizasaun Sagrada Familia (OSF) nian, deklara, nia preokupasaun ho impase polítika ne’ebé halo lider rezisténsia sira fila kotuk ba malu.

Komandante FALINTIL Lere Anan Timur ho Komandante FALINTIL, Cornelio Gama “L7” konversa hela iha ámbitu enkontru Organizasaun Sagrada Família, sesta (08/11/2019). Imajen/Eugénio Pereira

Reuniaun OSF ne’ebé hala’o iha Restaurante Vitória Metiaut Dili,  Lere konta tuir katak, lider sira agora ukun ne’e, hanesan Taur Matan Ruak nu’udar Primeiru-Ministru ho Francisco Guterres “Lú Olo” nu’udar Prezidente Repúblika, la’ós leet, maibé mesak gerrilleiru FALINTIL  luta iha ai-laran tinan 24 nia laran.

Nia dehan, ohin, Timor ukun-an, Taur Matan Ruak, iha partidu PLP, Lú Olo iha FRETILIN no Kayrala Xanana Gusmão, komandante ein-Xefe FALINTIL iha CNRT. Ukun ida ne’e, lidera hosi FALINTIL sira luta tinan 24 nia laran, maibé hamosu fali impase polítika ne’ebé prejudika dezenvolvimentu nasaun no povu nia moris di’ak.

“Ohin loron, ita nia maun sira ne’e la la’o hamutuk, sira ne’e maka soran ita, balun hosi PLP, CNRT no balun hosi FRETILIN. See mak sira nia ulun ne’e, ita nia maun sira ne’ebé mai hosi ai-laran, sira maka soran fali  ita. Mais iha maun sira nia kotuk ne’e, ema seluk mak halo hodi sira fahe lider rezisténsia nia ema atu naksobu,” deklara Lere Anan Timur.

Sé Timor mak la la’o ba oin iha lider rezisténsia sira nia ukun, Lere fiar katak, ema hosi nasaun seluk no ema sira lakohi ukun rasik-an ne’e sei tuur hamnasa no fó merese ba Timor. Tanba ne’e, nia husu ba Lú Olo, Taur ho Xanana,  atu  labele haluha katak, sira lori hela todan boot ida hosi ema rihun ne’ebé mate ba rai ne’e husu no hakarak sira atu kaer nafatin prinsípiu funu unidade nasionál.

Tuir nia haree, se lider sira ne’e maka fahe malu, ema seluk bele aproveita Timor-Leste nia frakeza hodi fahe Timor-oan no ikus aproveita fali rai ne’e nia bokur.

Nia dehan, prinsípiu unidade nasionál tenke kaer metin nafatin hanesan kultura ida ne’ebé metin ona dezde tempu rezisténsia, Frente Armada, Klandestina no Frente Diplomátiku ho povu hamutuk maka lori Timor-Leste hakotu funu naruk hosi konsulta populár 30 Agostu 1999.

Ba Timor-Leste iha tempu independénsia, Lere dehan la iha tan dalan atu fahe malu no sobu malu hanesan krize polítika no funu iha tinan 1975. Tanba ne’e, lideransa sira hanesan maun Xanana, Taur, Lú Olo ho Mari Alkatiri, atu lolo liman hamutuk hakotu impase polítika rai laran hodi hanoin de’it hadi’a povu no Timor-Leste nia futuru.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here