Primeiru-Ministru, Taur Matan Ruak. Imajen/TATOLI

DILI, 07 novembru 2019 (TATOLI) – Primeiru-Ministru (PM), Taur Matan Ruak, hateten Governu preokupa ho asuntu negósiu rai-laran, tanba seidauk iha kondisaun di’ak ba emprezáriu sira. 

Taur hateten lia hirak ne’e ba jornalista sira hafoin enkontru semanál ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Ita preokupa ho ita-nia assuntu negósiu. Governu tenke serbisu maka’as atu bele hadi’a ambiente negósiu ne’e rasik. Maibé, ida-ne’e la fásil tanba mundu ohin loron kompetitivu tebes. Ita mós foin ukun-aan tinan 17, labele kompara ita-nia aan ho nasaun avansadu sira ne’ebé ukun-aan tinan barak ona”, Taur  informa.

Xefe Governu ne’e mós fó ezemplu katak nasaun dezenvolvidu sira kondisaun ambiente negósiu di’ak tebes, tanba sempre fó ba emprezáriu sira di’akliu, kompara Governu ne’e, tanba ne’e Governu esforsu hela atu bele fó uluk kondisaun di’ak ba emprezáriu sira.

Nia kontinua katak nasaun barak mós sei konsidera Timor-Leste nu’udár nasaun ida-ne’ebé foin sai hosi konflitu.

Taur rekoñese katak dalaruma timoroan sira hakarak atu halo kioske oan ruma maibé tanba orsida mosu asalta malu entre grupu arte marsiál sunu tiha.

Perante situasaun ne’e, Taur dehan, timoroan mak tenke hatudu ona katak iha ona kbiit oinsá mak jere nasaun ne’e ho didi’ak atu fó ambiente negósiu ida-ne’ebé di’ak no seguru.

“Faktu hatudu katak foin lalais ne’e ita lori ona ita-nia emprezáriu ka investidór sira mai investe iha ita-nia rain no sira iha inisiativa hodi halo investimentu iha área pertróliu. Ne’e hatudu katak neineik ba neineik ema komesa iha ona konfiansa ba ita-nia rain”, nia subliña.

Maski nune’e, Xefe Governu ne’e konsidera katak seidauk to’o tanba tenke serbisu maka’as liután, liuliu instituisaun sira tenke forte, liuhusi haforsa-aan iha aspetu hotu.

Jornalista: Cipriano Colo

Editór: Xisto Freitas

1 KOMENTÁRIU

  1. Desde uluk kedas husi kedas ita ukun an too ohin loron mak preokupa hela deit. Ne laos buat foun ida. Ita nia emprezariu sira ne so bele depende deit ba projetus husi governu. E hotu-hotu mesak KKN deit. 95% ita sei importa sasan mai husi liur. Osan husi rai laran semo sai hotu ba liur. Returno ekonomiku kuaza ke la iha. Ita sei kuntinua uza osan fundu petroliu para moris loro-loron nian. Tuir lolos se ita matenek, osan inan mak rai iha trust fund fundu petroliferu ne la lika bok e sobu beibeik.

    wimmsapulete@yahoo.com

HAKEREK NO HATÁN

Please enter your comment!
Please enter your name here