Delegasaun Water Aid dadalia ho jornalista sira hafoin hala'o enkontru ho Xefe Estadu Lú Olo, iha Palásiu Prezidente Nicolau Lobato, kuarta (6/11/2019). Imajen Tatoli/Cipriano Colo

DILI, 06 novembru 2019 (TATOLI) – Reprezentante Water Aid husi Austrália, Reinu Unidu, Myanmar, Kambódia, Papua Nova Guinéa no Timor-Leste hala’o soru-mutuk ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Hafoin enkontru, Diretór Water Aid iha Timor-Leste, Justinho da Silva hateten Prezidente Repúblika apresia serbisu organizasaun Water Aid iha Timor-Leste hodi fornese bee-moos no saneamentu iha Munisípiu Manufahi no Liquiçá.

Nia dehan, Xefe Estadu apresia tanba Water Aid bele uza teknolojia apropriadu hodi transforma udan-been ba bee-moos iha fatin ne’ebé la hetan bee-matan.

“Haree ba esperiénsia fornesimentu bee-moos no saneamentu iha Manufahi no Liquiçá ne’ebé la’o ho di’ak tebes, Prezidente Repúblika husu atu Water Aid kontinua halo kooperasaun di’ak ho Governu Timor-Leste ne’ebé estabelese tiha ona durante ne’e hodi fornese bee-moos no saneamentu ba komunidade”, Justinho hateten.

Maski nune’e, nia hatutan, Prezidente Repúblika kontinua preokupa ho povu barak ne’ebé seidauk asesu ba bee-moos ne’ebé afeta tebes moris loroloron ninian, liuliu ba labarik no feto sira. Laiha asesu ba bee-moos afeta prosesu aprendizajen estudante sira nian no saúde komunidade ne’ebé fó impaktu boot ba sira-nia futuru.

Entretantu, Diretór Water Aid iha rai laran ne’e mós deklara katak organizasaun internasionál ne’e hala’o ona nia serbisu durante tinan-14 iha Timor-Leste no foin lalais, liuhusi kooperasaun ho autoridade lokál no komunidade iha Manufahi no Liquiçá deklara tiha ona munisípiu rua livre hosi ema soe fo’er arbiru, tanba hotu-hotu iha tiha ona haris-fatin rasik.

Justinho informa, durante ne’e Water Aid foku liubá munisípiu rua tanba haree ba orsamentu ne’ebé limitadu inklui rekursu umanu.

Nia haktuir katak Water Aid hetan apoiu morál, apoiu implementasaun programa ho fundu barak liu mai husi Governu Austrália, indústria bee sira no pesoál sira.

Nia haklaken, Water Aid mós propoin nafatin ba Governu atu investe orsamentu ba bee-moos, saneamentu no ijiene, maibé tenke asegura mós iha kapasidade ezekusaun.

“Tanba osan kuandu iha ona, presiza halo ezekusaun ho loloos nune’e komunidade bele asesu duni ba bee no saneamentu, hodi bele atinje duni Planu Estratéjiku Dezenvolvimentu Nasionál 2030, katak, popualasaun hotu bele asesu bee-moos no saneamentu”, nia subliña.

Bainhira husu kona-ba atinjimentu povu Timor-Leste liuliu asesu iha área bee-moos no saneamentu, Justinho esplika, tuir dadus iha Sensu Governu 2015, populasaun ne’ebé asesu ona bee-moos hamutuk %74,8 no populasaun ne’ebé seidauk asesu %25,2.

Kona-ba saneamentu, nia salienta, tuir dadus iha Sensu Governu tinan 2015, populasaun %57, signifika populasaun ne’ebé seidauk asesu ba saneamentu hamutuk %43.

Tuir planu, diretór ne’e fó hanoin katak delegasaun ne’e sei iha Timor-Leste to’o loron 9 fulan ne’e, sei kontinua diskute kona-ba estratéjia Water Aid nian kona-ba mudansa klimátika, rekursu bee, diskute oinsá povu asesu ba bee, saneamentu, ijiene, sei hasoru malu mós ho Governu no entidade relevante sira atu fó apoiu tan ba programa sira, aprende ba malu kona-ba planu programa sira ne’ebé susesu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here