Deputadu Bankada PLP, Sabino Soares “Guntur”. Imajen Tatoli/Egas Cristóvão

DILI, 7 novembru 2019 (TATOLI)—Deputadu Partidu Libertasaun Populár (PLP) propoin ukun hamutuk atu solusiona inserteja polítika, maibé Frente Revolusionária Timor-Leste Independente (FRETILIN) konsidera ideia ne’e la’ós fásil.

Deputadu Bankada PLP, Sabino Soares ‘Guntur’ hateten duké ba Eleisaun Antesipada di’ak liu ukun hamutuk ho partidu sira-ne’ebé hetan asentu parlamentár.

“Di’ak liu ukun hamutuk hodi hakotu impase polítika ne’e, tanba sei hela tinan tolu ne’e bele iha obrigatoriamente hamutuk. Bele mós dehan Governu Unidade Nasionál”, Guntur informa ba jornalista sira, iha Parlamentu Nasionál, kinta ne’e.

Nia dehan, situasaun polítika oras ne’e nakonu ho ódiu no vingansa, entaun problema boot ba futuru Estadu no povu ida-ne’e iha nakukun laran.

“Ukun hamutuk ne’e signifika Governu Unidade Nasionál. Partidu sé de’it tenke inklui iha laran. Agora sé mak opozisaun, sosieade sivíl, povu no akademista sira mak sai opozisaun. Nesesáriu ka lae, ne’e depende ba kondisaun mak deside. Kondisaun mak iha hakarak ka lakohi tenke halo-tuir”, Guntur subliña.

Iha parte seluk, Vise-Xefe Bankada Parlamentár FRETILIN, Francisco Miranda Branco, hateten líder-boot sira presiza tuur hamutuk atu ko’alia ba malu, maibé líder-boot sira-nia hahalok hanesan labarik ki’ikoan entaun susar tebes.

“Ida-ne’e la’ós buat fásil ida. Ne’e tenke konsensu entre partidu hotu-hotu tuur hamutuk hodi ko’alia matan ho matan, ibun ho ibun, entaun ita bele rezolve inserteja polítika ne’e”, Branco argumenta.

Entretantu, Xefe Bankada Parlamentár CNRT, Duarte Nunes, lakohi komenta hasoru ideia hosi PLP ne’e.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Ideia kapas sr. Deputadu.
    Mais tamba sa maka iha 2017 ne’e lahanoin kedas hanesan ne’e atu labele iha EA.

    Sr. Deputadu mos defende tasu hotu

HAKEREK NO HATÁN

Please enter your comment!
Please enter your name here