Ministru Koordenadór Asuntu Ekonómiku interinu No atuál Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/António Gonçalves

DILI, 6 novembru 2019 (TATOLI)–Ministru Koordenadór ba Asuntu Ekonómiku Interinu, Fidelis Manuel Leite Magalhães, hateten, tinan oin, Ministériu Koordenadór Asuntu Ekonomia (MEKAE) prioritiza prosesu adezaun Timor-Leste nian ba Organizasaun Mundiál Komérsiu.

“Razaun mak MEKAE sei foka ba iha prosesu adezaun Timor-Leste nian ba Organizasaun Mundiál Komérsiu”, Ministru Fidelis Magalhães, esplika liuhosi audiénsia públiku ho Komisaun D (trata Asuntu Ekonomia no Dezenvolvimentu), iha plenária Parlamentu Nasionál, kuarta ne’e.

Nia dehan, molok adere ba Organizasaun Komérsiu Mundiál ne’e, presiza haree uluk Timor-Leste nia polítika komérsiu.

“Konforme informasaun ne’ebé iha, dezde Governu anteriór, iha ona diskusaun atu elabora polítika nasionál ida ba komérsiu nian. Ita haree oinsá halo aliñamentu ho polítika Governu atuál nian ba Organizasaun Mundiál Komérsiu”, Fidelis haktuir.

Tuir planu, iha tinan oin, MEKAE sei organiza konferénsia internasionál kona-ba komérsiu nian no nasaun balun hosi organizasaun refere sei mai Timor-Leste.

Fidelis subliña, iha konferénsia ne’e mak Timor-Leste bele hatene vantajen adere ba Organizasaun Komérsiu Mundiál ne’e.

Entretantu, iha proposta orsamentu 2020 nian, MEKAE prevé millaun $2.257. Hosi totál orsamentu ne’e, saláriu no vensimentu rihun $161, bens no serbisu millaun $1.546 no transferénsia públika rihun $550. Purtantu,  laiha kapitál menór no kapitál dezenvolvimentu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here