Primeiru-Ministru, Taur Matan Ruak, prezide Reuniaun Konsellu Ministru iha Palásiu Governu, Dili, Kuarta (06/11/2019). Imajen TATOLI/Egas Cristovão

DILI, 6 novembru 2019 (TATOLI) – Governu liuhosi reuniaun Konsellu Ministru (KM), kuarta ne’e, aprova proposta deliberasaun ne’ebé aprezenta hosi Primeiru-Ministru, Taur Matan Ruak atu apoiu finanseiru ba Eleisaun Prezidensiál Guiné-Bissau ne’ebé sei realiza iha novembru ne’e.

“Ita sei fó apoiu ba eleisaun Guiné-Bissau hodi bele estabiliza rai ne’ebé belun boot Timor-Leste nian ne’e,” Ministru Estadu Prezidénsia Konsellu Ministru, Hermenegildo Augusto Cabral Pereira tenik iha Paláçio do Governo.

Nia dehan, Governu reafirma sei fó apoiu tanba tulun ne’ebé Timor-Leste haraik ba nasaun amigu ne’e hori uluk kedas, maibé la mensiona montante hira mak sei fó apoiu.

Iha parte seluk, Konsellu Ministru mós deside atribui pleno podér ba Sekretáriu Estadu Protesaun Sivíl, Alexandrinho de Araújo, sai hanesan Ministru Interiór Interinu.

“Objetivu hosi fó pleno podér ba Sekretáriu Estadu Protesaun Sivíl ne’e atu sai hanesan Ministru Interiór Interinu hodi asina akordu ho Autoridade Nasionál Jestaun Tasi Nasaun Repúblika Indonézia,” Hermenegildo esplika.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here