Embaixadór Xina iha Timor-Leste, Xiao Jiangu entrega doasaun ba Espoza Prezidente Repúblika, Cidália Mouzinho Nobre Guterres. Imajen Mídia PR

DILI, 07 novembru 2019 (TATOLI)–Governu Populár Xina oferese apoiu orsamentu $20.000 ba Gabinete Apoiu Atividade Konjúje Prezidente Repúblika (GAAC-PR-sigla portugés), iha Palásiu Prezidente Nicolau Lobato, Bairru Pité, Dili, ohin.

Doasaun refere entrega diretamente hosi embaixadór Xina iha Timor-Leste, Xiao Jiangu ba Espoza Prezidente Repúblika, Cidália Mouzinho Nobre Guterres.

“Ita hetan doasaun orsamentu husi Governu Populár Xina hanutuk $20.000, hodi apoiu atividade ne’ebé programadu ona”, Cidália ko’alia ba mídia hafoin serimónia entrega fundu ne’e.

Cidália informa katak, iha serimónia entrega doasaun ne’e, embaixadór Xiao apresia tebes ho atividade ne’ebé Gabinete Espoza Prezidente hala’o durante ne’e.

Maski la temi detalla kona-ba montante orsamentu ne’ebé oferese antes, maibé Espoza Prezidente Repúblika dehan, parte embaixada oferese ona apoiu kuaze dala-tolu ona ba gabinete.

Tanba ne’e, inan ba nasaun ne’e, agradese ba Governu Popular Xina liuhusi Embaixada iha Timor-Leste, ne’ebé durante ne’e sai hanesan parseiru importante tebes, dezde tinan-2017.

Husi apoiu hirak ne’e, Cidália hatutan, Gabinete bele tau-matan tuir programa hanesan: edukasaun sívika ka sosializasaun ba moras kankru-susun, apoiu bolsu estudu liuliu responde estudante sira-nia pedidu ba nesesidade eskola no apoiu ema kbiit laek.

“Ami sei apoia halo asaun karidade liuhusi ami-nia vizita no liuhusi pedidu ne’ebé ita-nia maluk sira hato’o mai gabinete. Maibé, apoiu hirak ne’e sei haree tuir nesesidade no posibilidade gabinete nian”, inan nasaun ne’e ko’alia.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here