Primeiru-Ministru, Taur Matan Ruak. Imajen Tatoli/Cipriano Colo

DILI, 07 novembru 2019 (TATOLI)–Oitavu Governu liuhusi reuniaun Konsellu Ministru (KM) deside hodi nomea José Luís Guterres nu’udar Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM) foun ba períudu tinan lima, tanba konsidera iha esperiénsia ukun durante tinan barak. 

Kinta ne’e, Primeiru-Ministru (PM), Taur Matan Ruak aprezenta nomeasaun ne’e ba Xefe Estadu, Francisco Guterres Lú Olo, durante enkontru semanál iha Palásiu Prezidente Nicolau Lobato, Bairru Pité, Dili.

“Governu hili José Luís bazeia ba ninia kompeténsia, esperiénsia hanesan Eis Vise Primeiru-Minstru, hanesan mós membru Governu durante tinan barak, hanesan mós líder rezisténsia, hanesan mós Eis Ministru Negósiu Estranjeiru no Kooperasaun. Ita haree katak José Luís Guterres iha esperiénsia barak duni”, Taur subliña.

Lee mós: Primeiru-Ministru Propoin José Luís Lidera RAEOA no ZEESM

Kona-ba antes ne’e José Luís hetan ona konfiansa hosi Estadu atu sai embaixadór ba Suiça, Xefe Governu hateten, ida-ne’e sei inválida no Governu sei halo fali nomeasaun foun atu asume kargu nu’udár diplomata hodi reprezenta Estadu Timor-Leste (TL) iha Jenebra (Suiça).

“Ida-ne’e sei inválida no Governu sei nomea ema foun atu troka José Luís Guterres”, nia haktuir.

Kona-ba ema foun atu substitui José Luís Guterres, PM dehan, sei iha prosesu no seidauk iha desizaun finál.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here