Komandante Polisia Militár, Majór Abel da Costa Xavier "NIKI". Imajen/Eugénio Pereira

DILI, 07 novembru 2019 (TATOLI)-Dezentendimentu entre membru Polisia Militár (PM) ho  membru Unidade Polisia Batallaun Orden Públiku (BOP), foin lalais ne’e, iha Dili, la afeta ba unidade forsa rua nian atu kontinua garante seguransa ba povu no ba nasaun.

Komandante Unidade Polisia Militár (PM) FALINTIL-Forsa Defeza Timor-Leste (F-FDTL), Majór Abel da Costa Xavier “Niki” konsidera, dezentendimentu ne’e problema ki’ik ida, ne’ebé parte investigadór Komandu F-FDTL ho PNTL forma tiha ona ekipa hodi investiga membru sira.

“Ha’u husu ba públiku labele ta’uk no preokupa, tanba seguransa ne’e metin ba povu no iha nivel nasionál tomak, tanba ami servisu hamutuk hela hodi haree ba estabilidade no ba dezentendimentu ne’e nia prosesu investigasaun la’o hela,” informa Komandante PM, Abel  “Niki”, ohin, hodi responde jornalista sira iha Kuartél PM, quintal Boot, Dili.

Majór Niki apela ba komunidade sira atu labele pániku, tanba forsa rua too agora sei kontinua servisu hamutuk nafatin.

 “Ba ami komandante ne’e kazu baibain no normal, buat ida uluk ema oho malu de’it mós ita bele rezolve, nusa maka konflitu labarik ki’ik sira ne’e bele rezolve,” afirma Majór Niki.

Iha parte seluk, Komandante Niki mós klarifika kazu membru F-FDTL hemu tua no lanu iha área Suku Bairru-Pité nian mós parte Polisia Militár fó ona kastigu ba nia membru ne’e.

Bazeia ba investigasaun, membru F-FDTL ne’e hemu tua no lanu iha loron finadu, 02 Novembru liubá halo barullu ki’ik. Nune’e, membru PNTL halo atuasaun hodi entrega ba Polisia Militár mak ba foti direita membru ne’e.

“Ami nia membru ne’e hemu tua uitoan polisia kontaktu mai ami sulan hela nia iha Kuartél PM to’o kuarta (06/11/2019), foin haruka nia fila, ne’ebé la iha problema,” nia hatete.

Komandante Jeral PNTL Komisáriu Faustino da Costa.Imajen/TATOLI

Iha parte seluk, Komandante Jerál PNTL, Komisáriu Faustino da Costa dehan, parte PNTL no F-FDTL koordena hodi investiga membru sira hodi hakotu konflitu ki’ik ne’e labele kontinua akontese iha futuru.

“Ne’e mosu dezentendimentu balun, agora ami koordena ho maluk sira hosi Forsa Defeza hodi investiga,”  Komisáriu Faustino da Costa hateten.

Komisáriu Polisia Faustino da Costa apela ba membru Unidade PNTL tomak atu kontinua servisu ho profisionalizmu hodi koopera nafatin ho Komandu F-FDTL fó seguransa ba povu no nasaun.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here