Símbolu partidu KHUNTO. Foto espesiál

DILI, 6 novembru 2019 (TATOLI)–Deputada Bankada Kmanek Haburas Unidade Timor Oan (KHUNTO), Olinda Guterres, kestiona ho partidu Congresso Nacional da Reconstrução de Timor (CNRT) ne’ebé lakohi troka ema na’in-hitu hafoin Prezidente Repúblika, Francisco Guterres ‘Lú Olo’ rejeita fó pose.

Nia dehan, desizaun Xefe Estadu ba ema na’in-sia ne’e labele kaer ukun, KHUNTO prontu troka ema oin foun.

“Tanba saida mak CNRT lakohi troka nia ema. Ami-nia ema na’in-rua ne’e prontu hela. Agora daudaun ha’u labele fó-sai naran lai”, Olinda ko’alia iha Parlamentu Nasionál, kuarta ne’e.

Nia argumenta, orsamentu 2020 boot tebes tanba ne’e tenke solusiona estrutura Governu hodi ezekuta osan refere.

“Ha’u ezije beibeik karik CNRT la lori ema foun na’in-hitu ba simu tomada pose, KHUNTO lori nia ema na’in-rua ba simu tomada pose ona. Se dada-malu nafatin susar ita atu la’o ba oin”, nia lamenta.

Nia afirma, KHUNTO kumpre desizaun Prezidente Repúblika, Francisco Guterres Lú Olo ne’ebé husu atu halo ponderasaun ba kandidatu membru Governu hirak ne’e.

“Se sira na’in-sia ne’e komete krime entaun tenke troka ema foun, maibé seidauk identifika ami-nia ema na’in-rua komete krime ka korrupsaun. Maibé tanba desizaun Prezidente Repúblika hanesan ne’e ona, ami kumpre”, Olinda informa.

Purtantu, Xefe Bankada Parlamentár CNRT, Duarte Nunes, hateten atu to’o iha ne’ebé mós ema na’in-hitu hosi CNRT nian sei la troka.

“To’o mandatu tinan-lima ne’e hotu, ami kontinua mantein. Prezidente Repúblika tenke hatudu prova katak ema hirak ne’e komete krime”, nia realsa.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here