Sekretáriu Jerál FRETILIN, Marí Alkatiri. Imajen Tatoli/António Gonçalves

DILI, 07 novembru 2019 (TATOLI) – Eis Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), Marí Alkatiri fiar Governu nomea ema foun atu substitui nia fatin, sei di’akliu nia. 

“Ha’u lakohi fó komentáriu tanba ha’u fiar Governu sei nomea ema ruma atu substitui ha’u nia fatin, sei di’akliu ha’u”, hateten Alkatiri hafoin sai oradór ba primeira konférensia nasionál ne’ebé organiza husi Comité Orientadór 25, iha Centro Convenções Díli, ohin.

Bainhira husu oinsá nia hanoin kona-ba figura José Luís Guterres “Lugu” ne’ebé Governu nomea ona, Alkatiri hateten ho pesimista katak Lugu sei lidera Oé-Cusse tinan ida de’it.

“Ne’e imi he’in de’it mak imi haree rezultadu. Tinan ida de’it”, nia hateten ho hamnasa.

Kona-ba ne’e, iha fatin hanesan, José Luís Guterres hateten, nia simu konfiansa ne’e tanba la’ós nia matenek liu, maibé Lugu presiza liu maka serbisu ho rezultadu konkreta atu hadi’a povu Oé-Cusse nia moris.

“Liu tiha tinan ida mak haree povu Oé-Cusse nia moris ne’e oinsá. Tanba, ha’u fiar Oé-Cusse oan iha matenek barak, no ha’u sei forma ekipa, ami serbisu hamutuk atu dezenvolve Oé-Cusse”, dehan Lugu ho fiar aan.

Entretantu, Lugu ne’ebé moris iha Uatulari, Viqueque, oras ne’e daudaun idade 65, substitui Marí Alkatiri, nu’udár prezidente Autoridade RAEOA, hafoin mandatu ramata iha fulan-jullu tinan ne’e.

Lugu nu’udar líder rezisténsia ne’ebé iha tempu ukun-aan hola parte nu’udar membru Governu hanesan eis vise Primeiru-Ministru no eis Ministru Negósiu Estranjeiru no Kooperasaun.

Iha diplomasia, Lugu hanesan líder diplomata durante okupasaun Indonézia, iha ukun-aan sai nu’udar embaixadór Timor-Leste ba Organizasaun Nasaun Unida (ONU), asume mós kargu ezekutivu oioin, inklui nu’udar membru Parlamentu Nasionál husi Partidu Frenti-Mudança.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here