Koordenadór AIFAESA, Abílio Oliveira Sereno. Imajen/Jogerjo Guterres.

DILI, 07 Novembru 2019 (TATOLI) – Koordenadór Autoridade Inspesaun no Fiskalizasaun Atividade Ekonómika no Sanitaria (AIFAESA), Abílio Oliveira Sereno, informa tempu badak nia laran AIFAESA sei asina memorandum of understanding (MoU) ho Badan Pengawas Obat dan Makanan (BPOM) Repúblika Indonézia nian atu tulun hodi halo kontrolu ba ai-han ne’ebé sirkula iha Timor-Leste (TL).

Tuir Koordenadór, daudaun ne’e AIFAESA laiha laboratóriu no ekipamentu adekuadu ba teste hahán, tanba ne’e sei halo kooperasaun ho Badan BPOM atu ajuda AIFAESA ba kontrolu sasán importadu sira liuliu liga ba kestaun seguransa ai-han.

“Ami planu ona iha tempu badak sei servisu hamutuk ho Badan Pengawas Obat dan Makanan, maibé tenke liuhusi asina MoU, nune’e karik problema hanesan daudaun ba foos plástiku ita bele foti nia amostra lori bá sira teste iha laboratóriu hodi hatene loloos katak produtu ne’e kontamina duni ka lae”, Abílio haktenik ba jornalista sira liuhusi konferénsia imprensa iha Matadouru ohin.

Koordenadór ne’e dehan bainhira kooperasaun ne’e la’o ona maka AIFAESA sei lori amostra hahán sira ne’ebé deskonfia kontaminadu bá halo teste laboratóriu iha BPOM.

Abílio Oliveira Sereno afirma serbisu hamutuk ne’e la’ós de’it ba halo kontrolu ai-han, maibé liuhusi kooperasaun ne’e instituisaun BPOM sei fó kapasitasaun ba rekursu umanu AIFAESA, nune’e bele hatene liu kona-ba oinsá atu kontrola hahán ho di’ak liután.

Labele Halo Teste ba Amostra Foos Globus Tanba Laiha Rekursu

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here