Prezidenti Tribunal Rekursu, Deolindo dos Santos. Imajen/Antonio Goncalves

DILI, 06 novembru 2019 (TATOLI)-Tribunál Rekursu (TR) prevee millaun $9,175,794 iha proposta Orsamentu Jerál Estadu (OJE) tinan fiskál 2020 atu bele kobre nesesidade servisu no atividade programatiku Tribunál Rekursu nian.

Liuhosi audiénsia ho Komisaun A Parlamentu Nasional ba asuntu Justisa no Konstitusionál, ohin, iha sala Komisaun A nian, Prezidente Tribunál Rekursu (PTR), Deolindo dos Santos, husu ba reprezentante povu iha Uma Fukun PN, liuliu Distintu membru  Komisaun A atu bele tetu proposta orsamentu Tribunál Rekursu nian.

PTR Deolindo dos Santos konsidera proposta orsamentu ho valor  Millaun $9,175,794 la sufisiente atu bele kobre nesesidade hotu TR nian. Nune’e, husu kolaborasaun hosi PN atu bele aumenta tan montante balun hosi proposta inísiu.

“Ami iha pedidu adisionál kuaze rihun $801 hodi halo kompleta orsamentu totál Millaun $10 liu uitoan,” esklarese PTR Deolindo dos Santos, ba jornalista, hafoin audiénsia ho Komisaun A.

Orsamentu ne’ebé prevee fahe ba kategoria saláriu e vensimentu, bens e servisu, transparénsia publika, kapitál menór, kapitál dezenvolvimentu no seluk tan.

Deolindo dehan, sira husu atu aumenta orsamentu hodi halo konstrusaun emerjénsia uma foun ba juis sira iha Tribunál Munisipiu tolu, Baucau, Oe-Cusse ho Covalima.

Biban ne’e, Tribunál Rekursu aprezenta mós ezekusaun OJE 2019 ho totál orijen $198,546,151.00, Kompromisu sira, $.00, Obrigasaun sira $.00, atuál $186,413,205.69, saldu $12,132,945.31  ne’ebé ezekuta too ona porsentu 93.9%.

“Molok remata tinan ne’e, ami nia ezekusaun bele atinje 100%,” hateten Deolindo dos Santos.

Iha parte seluk, Prezidente Komisaun A PN, Carmelita Caetano Moniz, durante diskusaun deklara sei haree no konsidera pedidu ne’ebé Tribunál Rekursu para aprezenta iha plenária PN.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here