Objetivu Dezenvolvimentu Sustentável (ODS)

DILI, 06 novembru 2019 (TATOLI)-Reprezentante husi nasaun 40 iha mundu kompostu husi partisipante hamutuk ema na´in 250 sei partisipa konferénsia internasionál kona-ba Objetivu Dezenvolvimentu Sustentável (ODS) iha Timor-Leste ne´ebé sei realiza iha loron 11 to´o 14, semana oin.

“MNEK sei organiza hamutuk ho Nasaun Unida, eventu boot ida iha Timor ne’ebé reprezentante nasaun 40 husi partisipante hamutuk 250 sei mai iha Timór atu tuir konferensia kona-ba Objetivu Dezenvolvimentu Sustentável (ODS), númeru 16 hodi haree ba Timór nia susesu, obstakúlu,” informa Ministru Dionísio da Costa Babo Soares ba jornalista sira hafoin partisipa enkontru Konsellu-Ministru iha Palásiu Governu, Dili, ohin.

Diplomata timoroan ne’e informa, Timór nia dezafiu ne’ebé hasoru durante ne’e, haree mós ba asuntu sira ne’ebé mak progresu ne’ebé Timór halo durante tinan hira-nia laran no buat ida sira bolu SDG (Sustainable Development Goals) showcase, ne’ebé ema hamutuk 250 husi nasaun 40 sei mai iha Timor, husi dia 11 to’o dia 14 novemnbru semana oin.

Eis-Ministru Justisa iha Sestu Governu Konstitusionál ne´e reforsa, nasaun 40 ne’e hotu hakarak mai voluntáriu. “MNEK organiza buat ne’e (konferénsia) tanba uluk halo ona iha, Georgia, depois iha 2017 no 2018 halo iha Siera Leone, agora iha 2019 halo iha Timor-Leste, hodi hatudu ita-nia progresu dezenvolvimentu sustentável to’o iha ne’ebé ona, bazeia ba SDG showcase ou SDG 16 Showcase,” dehan diplomata timoroan ne’e.

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here